Ардчилсан хувьсгалын 30 жилийн ойтой холбогдуулан УИХ-ын өнөөдрийн чуулганаар гишүүд үг хэлж, санал хүргүүллээ.

УИХ-ын гишүүн Ж.Батзандан: Ерөнхий прокурор чинь гудамжинд гарсан байна. Бүлэглэлүүд нийлж байгаад хөөгөөд гаргачихаж. Үүний улмаас бүх хэрэг прокурор дээр очоод гацаж байна. Энэ прокурорын байгууллага дээрээ анхаар. Ерөнхий прокуророо ажилд нь оруул. Хуулийн байгууллагын завхрал чинь дахиад явагдаад эхэллээ. Ерөнхий прокуророо ажилд нь оруул Их Хурлын дарга аа. Энэ талаар албан ёсоор танд тавьж байна. Хоёрдугаарт, төрийн өндөр албан тушаалтай, дипломатууд чинь хар тамхины хэрэгт холбогдож байна. Энэ талаар хэлэхдээ цаанаасаа ийм даалгавартай гэж хэлж байна шүү.

УИХ-ын дарга Г.Занданшатар: Прокурорын байгууллатгатай холбоотой асуудлыг шалгаж, шийдвэрлэх чиглэлийг Хууль зүйн байнгын хороонд өгч байна. Хар тамхитай холбоотой асуудлаар ажлын хэсэг байгуулж, эргэн танилцуулах болно.

УИХ-ын гишүүн Л.Болд: 30 жилийн өмнө Монголын ард түмэн жагсаж хүний эрх, эрх чөлөөг дээдэлдэг хүмүүнлэг ардчилсан нийгэм руу явах томоохон замаа эхлүүлсэн. Үүнийг төрийн хүндтэй индрээс цохон тэмдэглье. Уг рхөдөлгөөнийг эхлүүлэхэд оюутнуудын үүрэг их байсан. Хамгийн анхны жагсаалыг Ховдын дээд сургуулийн оюутнууд эхлүүлж анх удаа ард иргэд оролцсон цуглаан зохион байгуулж, ардчиллын оч асаасан юм. Мөн Сүхбаатарын талбай дээр болсон ажил хаялтын хамгийн хүндийг оюутнууд үүрсэн. Тиймээс 89, 90 онд оюутан байж, эрх чөлөөний төлөө амь биеэ үл хайрлан ардчиллын төлөө зүтгэсэн оюутнуудад баяр хүргэе.  

Ингээд УИХ-ын хуралдаан “Эмзэг бүлгийн иргэдийн эрүүл мэндийн тусламж үйлчилгээний хүртээмжийг сайжруулах хөрөнгө оруулалтын хөтөлбөр”-ийн Санхүүжилтийн ерөнхий хэлэлцээрийн төслөөр үргэлжилж байна.

Б.Лхам