Оросын дрон Украины баруун хойд хэсэгт, Польшийн хилийн ойролцоох Ягодин хотын шатахуун түгээх станцыг цохисон талаар Украины эрх баригчид мэдээлжээ. Энэ нь Орос, Украины хоорондох агаарын цохилт эрчимжиж буй энэ үед гарсан бөгөөд Европын Холбоо болон НАТО-гийн хилтэй тун ойрхон газар халдлага болсон нь анхаарал татаж байна.
Украины Гадаад хэргийн сайд Андрей Сыбига халдлагыг эрс буруушааж, Оросын довтолгоо Украин-Польшийн хилийн боомтод ойртож байгаа нь зөвхөн Украины эсрэг төдийгүй Европын Холбоо, НАТО-гийн аюулгүй байдалд заналхийлж буйг харуулж байна гэж мэдэгджээ. Халдлагын улмаас Ягодин дахь хилийн боомт түр хугацаанд хаагдсан ч ням гарагийн өглөөний 10 цаг гэхэд хэвийн үйл ажиллагаандаа орсон байна. Тус боомт нь Украинд барууны орнуудаас нийлүүлж буй цэргийн болон хүмүүнлэгийн тусламжийг тээвэрлэх чухал гарцуудын нэг юм.
Польшийн Гадаад хэргийн сайд Радослав Сикорски Киевт айлчлах үеэрээ уг халдлагын талаар байр сууриа илэрхийлж, Орос шинэчилсэн технологи бүхий, тийрэлтэт хөдөлгүүртэй, чиглүүлэлтийн систем нь сайжруулсан дрон ашигласан гэж мэдэгджээ. Түүний хэлснээр энэ нь Украины хувьд томоохон сорилт төдийгүй цаашид Оросын түрэмгийллийн бай болж болзошгүй бусад улс орны хувьд ч ноцтой анхааруулга юм.
Үүнээс гадна Украины төмөр замын байгууллагын мэдээлснээр Польшийн хилээс ердөө хоёр километрийн зайд зорчигч тээврийн галт тэрэгний зүтгүүр Оросын дроны халдлагад өртжээ. Тухайн үед Ягодин өртөөнд Европын холбооны хэд хэдэн орны аюулгүй байдлын зөвлөхүүд, Европын улс төрийн өндөр албан тушаалтнууд явсан дипломат галт тэрэг байсан аж. Мөн өөр нэг галт тэргэнд АНУ-ын Тагнуулын төв газрын /CIA/ захирал асан Дэвид Петреус явж байсан талаар Украины төмөр замын байгууллага мэдээлсэн байна.
Их Британийн Ерөнхий сайд асан Борис Жонсон энэ халдлагыг буруушааж, Польшийн хил дээр зогсож байсан Украины галт тэргийг Оросын тал цохисон гэж мэдэгдсэн байна. Шведийн Ерөнхий сайд асан Карл Билдт ч мөн Польшийн хил орчимд болсон халдлагын үеэр ойролцоох галт тэргэнд дрон цохилт өгснийг мэдээлжээ.
Украины Ерөнхийлөгч Владимир Зеленский өнгөрсөн долоо хоногийн хугацаанд Оросын тал Украин руу 2,000 гаруй дрон хөөргөсөн бөгөөд тэдгээрийн олонх нь ердийн дроноос хурдан, илрүүлж устгахад хүндрэлтэй тийрэлтэт хөдөлгүүртэй загварууд байсан гэж мэдэгдсэн байна. Оросын Батлан хамгаалах яам харин Украины баруун хэсгийн төмөр замын дэд бүтцэд цохилт өгснөө хүлээн зөвшөөрч, Европын орнуудаас Украинд нийлүүлж буй цэргийн ачаа тээвэрлэдэг байгууламжуудыг бай болгосон гэж мэдэгджээ.
Үүний зэрэгцээ Украины арми ОХУ-ын Татарстан дахь газрын тос боловсруулах үйлдвэрт дрон цохилт өгсөн байна. Украины талын мэдээлснээр Нижнекамск хотын ТАНЕКО боловсруулах үйлдвэрийг тусгай ажиллагааны хүчнийхэн, Аюулгүй байдлын алба болон Тагнуулын ерөнхий газар хамтран довтолсон байна. Татарстаны эрх баригчид Украины халдлагын улмаас хоёр энгийн иргэн амиа алдаж, хэд хэдэн хүн шархадсан гэж мэдээлжээ.
Л.Баяр
