АНУ-ын Конгрессын хяналтыг аль нам гартаа авахыг шийдэх завсрын сонгууль болоход зургаахан хоног үлдээд байна. Дональд Трамп болон Ерөнхийлөгч асан Барак Обама нар сонгогчдын дэмжлэгийг авахын тулд сонгуулийн кампанит ажлаа эрчимжүүлжээ. Сонгуулийн урьдчилсан санал хураалтаар 35 сая орчим хүн саналаа өгөөд байна.

Сонгуулийн урьдчилсан таамаглал, тойм судалгаагаар Төлөөлөгчдийн танхимын хэд хэдэн өрсөлдөөнт тойрогт Ардчилсан намын нэр дэвшигчдийн байр суурь өөрчлөгдөж байгааг CNN мэдээлжээ. Сонгуулийн шинжээч Ларри Сабатогийн баг 21 тойргийн үнэлгээг Ардчилсан намын талд өөрчилсний дотор Флорида, Хойд Каролина, Өмнөд Каролина мужийн Сенатын гурван суудал багтсан байна. Гэхдээ эдгээр нь сонгуулийн үр дүн биш, харин судлаачдын тухайн үеийн үнэлгээ юм.

АНУ-ын Конгресс хоёр танхимтай. Төлөөлөгчдийн танхимын бүх 435 суудлын төлөө өрсөлдөх бол Сенатын 100 суудлын 35 нь энэ удаагийн сонгуулиар шийдэгдэнэ. Ардчилсан нам Төлөөлөгчдийн танхимд олонх болохын тулд цэвэр дүнгээр дөрвөн суудал, Сенатад олонх болохын тулд дөрвөн суудал нэмж авах шаардлагатай.

Трамп сонгуулийн үр дүнг хүлээн зөвшөөрөхөө мэдэгдэв

Дональд Трамп сонгуулийн дүнг хүлээн зөвшөөрөх эсэх талаар асуухад “Хэрэв шударга сонгууль бол тийм” гэж хариулжээ. Түүний өмнөх мэдэгдлүүд сонгуулийн үр дүнтэй холбоотой маргаан дахин үүсэж болзошгүй гэсэн болгоомжлолыг төрүүлж байна. Үүний зэрэгцээ Барак Обама Жоржиа мужид Ардчилсан намын нэр дэвшигчдийг дэмжих арга хэмжээнд оролцохоор төлөвлөсөн бол Трамп Охайо мужид сонгуулийн сурталчилгаагаа үргэлжлүүлжээ. Сонгогчдын анхаарлыг татаж буй гол асуудлуудын нэг нь амьжиргааны өртөг, үнийн өсөлт байна. Ардчилсан намын зарим төлөөлөгч Конгресст олонх болсон тохиолдолд өрхийн зардлыг бууруулах асуудлыг тэргүүлэх чиглэл болгох ёстой гэж мэдэгджээ.

         АНУ-ын завсрын сонгууль арваннэгдүгээр сарын 3-нд болно. Сонгуулийн дүн нь Конгрессын хоёр танхимын хяналт, улмаар Трампын засаг захиргаа хууль тогтоох үйл ажиллагаагаа хэрхэн хэрэгжүүлэхэд чухал нөлөө үзүүлэх юм.

Л.Баяр