Хүнс, хөдөө аж ахуй, хөнгөн үйлдвэрийн сайд Ц.Идэрбат өнөөдөр БНСУ-аас Монгол Улсад суугаа Онц бөгөөд Бүрэн эрхт Элчин сайд Чой Жин Воныг Төрийн ордонд хүлээн авч уулзан, салбарын хамтын ажиллагааны талаар санал солилцов.
Сайд Ц.Идэрбат уулзалтын эхэнд хамтын ажиллагааг бодит үр хүрнэ гэдэгт итгэж буйгаа илэрхийлж, БНСУ-аас Монгол Улсад, салбарт хэрэгжүүлж ирсэн төсөл хөтөлбөр, хэрэгжүүлж байгаа төслүүдийн танилцуулж, талархал илэрхийлэв.
Монгол Улсын хувьд Бүгд Найрамдах Солонгос Улс нь эдийн засаг, технологи, хөдөө аж ахуйн салбарт хамтран ажиллах бодит боломж бүхий “Стратегийн түншлэл”-тэй чухал түнш юм.
БНСУ-ын зүгээс “Монголын хүнс, хөдөө аж ахуйн бүтээгдэхүүний аюулгүй байдлын удирдлагын тогтолцоог бий болгох төсөл”, “Малын гаралтай бүтээгдэхүүний аюулгүй байдлын тогтолцоо байгуулах төсөл”, “Халх голын бүсийн хөдөө аж ахуйн хөгжлийн төсөл”, “Ухаалаг хүлэмжийн цогцолбор байгуулах төсөл зэрэг олон төсөл, хөтөлбөрүүдийг БНСУ-ын Олон улсын хамтын ажиллагааны байгууллага (KOICA) болон Солонгосын хөдөө аж ахуйн төсөл хэрэгжүүлэх төв (KOPIA) байгууллагуудаар дамжуулан хэрэгжүүлж ирсэн нь манай улсын хүнс, хөдөө аж ахуй, хөнгөн үйлдвэрийн салбарын хөгжилд бодит үр дүнгээ өгөөд байгааг тэмдэглэж, БНСУ-ын ард түмэнд салбарын хамт олны нэрийн өмнөөс талархаж буйгаа илэрхийлэв.
Тэрбээр БНСУ-ын Ерөнхийлөгч И Жэ Мёны Монгол Улсад хийсэн төрийн айлчлалын хүрээнд байгуулсан харилцан ойлголцлын 3 санамж бичгийн хэрэгжилтийг хангахад идэвхтэй хамтран ажиллахаа илэрхийлсэн юм. Энэ хүрээнд хоёр талын хамтын ажиллагааг уялдуулах “Монгол-Бүгд Найрамдах Солонгос Улсын Хөдөө аж ахуйн хамтарсан хороо”-ны Монголын талын бүрэлдэхүүнийг шинэчлэн баталж, шуурхай ажиллаж буйг дурдав.
Мөн тэрбээр Монгол Улс хөдөө аж ахуйн бүтээгдэхүүнийг экспортын чиг баримжаатай хөгжүүлэх бодлого баримталж буйг онцлоод, дотоодод тарьж ургуулсан гурвалжин будаа, цагаан будаа, ногоон тэжээл, арвай, улаанбуудайн гурил, эмийн ургамлыг БНСУ-д экспортлоход хорио цээрийн стандарт, импортын квотыг хөнгөвчлөх, тэр дундаа гурвалжин будааг бага татварын квотод хамруулахад хамтран ажиллах шаардлагатайг тэмдэглэлээ. Түүнчлэн БНСУ-д албан айлчлал хийж, салбарын хамтын ажиллагаа, экспортын асуудлыг хэлэлцэхээ мэдэгдэв.
Элчин сайд Чой Жин Вон хүнс, хөдөө аж ахуйн салбарыг Монгол Улсын ирээдүйн хөгжлийн гол тулгуур, өрсөлдөх чадвартай салбар гэж харж буйгаа илэрхийллээ. Тэрбээр цаашид "КОЙКА" болон "КОПИА"-ийн төслүүдийг нэгтгэн, Монгол Улсын мал аж ахуйн үйлдвэрлэлийн бүтээмж, чанар, аюулгүй байдлыг сайжруулах зорилго бүхий нэгдсэн технологийн суурь баазыг бүрдүүлэх төслийг дөрвөн жилийн хугацаатай хэрэгжүүлэхээр төлөвлөж байгааг дурдав. Монгол Улс экспортын бараа бүтээгдэхүүнээрээ эхлээд дотоодын хэрэгцээгээ хангах нь чухал гэдгийг тэмдэглэв.
Мөн тэрбээр махны экспортын тухайд хоёр улсын хооронд байгуулж буй Эдийн засгийн түншлэлийн хэлэлцээр хүлээгдэж байна. Хэлэлцээр албажсанаар Монголын үхрийн махны 25-40 хувийн татварыг таван жилийн хугацаанд бүрэн чөлөөлөхөөр тусгасан. Тиймээс малын гоц халдварт өвчний асуудлыг шийдэж, БНСУ-ын стандартад нийцүүлэх шаардлагатайг онцолсон юм. Түүнчлэн ХХААХҮ-ийн сайдын БНСУ-д хийх айлчлалыг үр дүнтэй, ажил хэрэгч болно гэдэгт итгэлтэй байгаагаа илэрхийлэв.
Уулзалтын төгсгөлд Элчин сайд Чой Жин Вон Эдийн засгийн түншлэлийн хэлэлцээрийг ирэх оны 4-5 дугаар сард болох Монгол Улсын Ерөнхийлөгч У.Хүрэлсүхийн БНСУ-д хийх айлчлалаас өмнө уг эцэслэнэ гэж найдаж байгаагаа илэрхийллээ. Сайд Ц.Идэрбат тус эдийн засгийн түншлэлийн хэлэлцээрт гурвалжин будаа, ногоон тэжээл болон хуш модны самрын экспортын асуудлыг тусгайлан дурдаж, хоёр улсын найрамдалт харилцааг өргөжүүлэхэд хүнс, хөдөө ахуй, хөнгөн үйлдвэрийн салбар гол хувь нэмрээ оруулна гэж зорьж буйгаа онцлов.
Мөн хуш модны самар зэрэг өндөр өртөгтэй бараа бүтээгдэхүүнийг агаарын тээврээр экспортлох нь хоёр улсын чиглэл дэх тээврийн зардлыг бууруулах ач холбогдолтойг тэмдэглэлээ. Ингэснээр БНСУ-аас бараа дүүрэн ирээд буцахдаа хоосон нисдэг агаарын хөлгүүдийн ачааллыг тэнцвэржүүлж, ложистикийн өртөг буурах бөгөөд улмаар худалдааны эргэлт нэмэгдэх боломжтойг Элчин сайд онцолсон юм. Үүнээс гадна Монгол Улс дотооддоо ахиу тариалдаг улаанбуудай, төмс зэрэг хямд үнэтэй, овор ихтэй бүтээгдэхүүнийг агаарын тээврээр бус, ложистикийн бусад хувилбараар тээвэрлэн экспортлох боломжтойг уулзалтын үеэр харилцан тэмдэглэлээ.
