УИХ-ын чуулганы өнөөдрийн хуралдаанаар Үл хөдлөх хөрөнгийн албан татварын тухай хуульд нэмэлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх эсэх  асуудлаар хуралдаж байна. Хуулийн төсөлд дархан цаазат Богдхан уулын орчимд аялал жуучлалын нэрээр баригдсан орон сууц, худалдаа үйлчилгээний барилга байгууламжийн өмчлөгч, зориулалтаас үл хамаарч иргэнээс нэг м.кв талбайгаас 1000 төгрөг, хуулийн этгээдээс 3000 төгрөгөөр бодож татвар авахаар хуулийн төсөлд тусгасан байна.

Үүнтэй холбогдуулан гишүүд хуулийн төслийг хэлэлцэхийг дэмжих эсэх саналаа хэллээ.

Д.Ганбат: Эрх зүйн орчин нь байсан болоод л тусгай хамгаалалттай газарт барилга барьсан байж таарна биз дээ. Олон жилийн турш мухардалд орохоор нь 1000-3000 төгрөгийн татвар авах гэж байгаа бололтой. О.Баасанхүү гишүүний хэлсэн нэг талдаа зөв. Татварын хэмжээг нэммээр байна. Дархан цаазат газарт барилга барьж болдог гэсэн жишиг бугшлаа. Тэгэхгүй бол харин ч эсрэгээрээ дэмжсэн үйлдэл болох вий. Мөн үл хөдлөх хөрөнгө гэдэг утгаар нь татвар ногдуулж байна уу, эсвэл газар гэдэг утгаар нь хандаж байна уу?.

М.Оюунчимэг: Яг энэ асуудлаар олон иргэн тэмцэл хийсэн. Туул голд тулгаж байшин барьсан үйлдэл олон бий. Зайсангийн аманд цэцэрлэг барина гэж газар аваад орон сууц барихаар хашаа барьж байсныг Өргөдлийн байнгын хорооноос зогсоож чадсан. Нийт 54 ААН-ийн зөвшөөрлийг цуцлуулсан. Үүнд манай танхимын гишүүд сайн ажилласан. Эрх мэдэлтэй бүлэглэл хууль зөрчиж газар авдаг. Улмаар төрийг хүчгүйдүүлдэг үйлдэл гаарсныг хүлээн зөвшөөрч, аргаа бараад татвар авдаг больё гэж байна. Гэхдээ 1000-3000 төгрөг гэдэг бол бага дүн байна. Байгаль орчныг доройтуулсан хүмүүсээс хэдэн төгрөгийн татвар авах тухай ярих нь зохимжгүй. Ус ашигласны төлбөрөө авч чадаагүй тохиолдол өчнөөн байна. Тиймээс татварыг өндөр тогтоох ёстой. Зайсангийн аманд хэдийнэ байшин бариад айлууд орчихсон байна. Татвар өндөр тогтоож байж ийм үйлдэл давтагдахаас сэргийлэх боломж бага боловч нээгдэнэ. Н.Цэрэнбат сайдтай санал нэг байна. Хууль зөрчиж барилга барьсан байхад хувь хүний өмч гээд эсрэг талд шүүгч шийдвэр гаргах нь буруу.

Д.Оюунхорол: Н.Цэрэнбат сайдын саналыг дэмжинэ. Зайсан хавьд сууршлын бүс үүссэн. Бүх хүн мэднэ. Үл хөдлөх хөрөнгө худалдаж авсан хэрнээ үл хөдлөх хөрөнгийн гэрчилгээгээ авч чадааагүй олон иргэн, ААН бий. Зайсанд гэхэд 280 ААН бий. Иргэдийн хувьд 10-20 мянгад хүрсэн. Үнэнтэй нүүр тулах цаг болсон. Энэ хүмүүс үл хөдлөхийн гэрчилгээ байхгүй гэж татвар төлөхгүй байна. Тиймээс үл хөдлөх хөрөнгөний татварыг ямар нэг аргаар авахаас өөр аргагүй. Тусгай хамгаалалтын газарт газар олгосон талаарх судалгаа байдаг. Хэний Засгийн газар байхад, БОАЖ-ын сайд байхдаа гээд нарийн судалгаа бий. Би салбарын сайдаар ажиллаж байхдаа цөөнгүй зөвшөөрлийг цуцалсан. Түүнчлэн Зайсан хавьд дахь 7000 орчим өрх 30-50 жил амьдарсан. Гэтэл үл хөдлөхийн асуудал нь баталгаажаагүй байсныг шийдэж өгсөн.