УОК-ын шийдвэрээр БНЭУ дахь монгол иргэдээ татан авахаар болсон билээ. Одоогоор 480 орчим иргэн хүсэлтээ гаргасан бөгөөд эдгээрийн 21 нь эрүүл мэндийн шалтгаантай, 164 нь оюутан, 260 нь насанд хүрээгүй хүүхэд, 44 нь бусад шалтгаантай иргэд юм байна.

Тэгвэл тус улс руу бага оврын онгоцоор хоёр удаа нислэг үйлдэнэ гэдгийг Гадаад харилцааны яамны Консулын газрын дарга Л.Мөнхтүшиг хэвлэлд тайлбар өглөө. Тодруулбал, тус улсад хөл хорио тогтоосон учраас хот хоорондын тээвэр бүрэн зогссон аж.

Тиймээс эх орондоо нутаг буцах хүсэлтэй иргэдийг нэг цуглуулах хүндрэлтэй байгаа учир эхний онгоц нь Дели хотод газардах бол, хоёр дахь онгоц нь нутгийн баруун урд хэсэгт байрлах ламхай нарын шавилан сууж буй хотын ойр газардах юм байна.

Одоогийн байдлаар МИАТ компани тус улс руу нислэг үйлдэхээр бэлтгэлээ базааж буй гэх мэдээлэл бий. Ингэхдээ БОИНГ-737 загварын онгоцоор нислэг үйлдэх бололтой. Уг загварын онгоц нь 160 гаруй зорчигчийн суудалтай гэхээр хоёр удаагийн нислэгээр нийт 310 орчим иргэн эх орондоо эргэн ирэх боломжтой болох аж. Ингэж тооцвол хүсэлт гаргасан 480 иргэнээс 100 гаруй иргэн хоцрохоос өөр аргагүй болох нь. Тиймээс тэдний асуудал хэрхэх бэ гэдэг асуудал урган гарч ирэх нь дамжиггүй.

Уг асуудлаар Монгол Улсын Шадар сайд Ө.Энхтүвшин өнөөдөр БНЭУ-аас Монгол Улсад суугаа Элчин сайд М.П.Сингхийг хүлээн авч уулзах үеэрээ аль болох том онгоцоор нислэг үйлдэхээр судалж байна гэдгийг онцолсон.

Ингэхдээ “Бидэнд тулгарч байгаа бэрхшээл нь Энэтхэг улсын олон хотод манай улсын иргэд тархан байршсан. Тиймээс аль хэсэгт хамгийн ихээр хүн олноор төвлөрсөн байна, аль хот руу нислэг үйлдэх вэ зэрэг судалгаан дээр ажиллаж байна” гэсэн юм. Энэ хоёр тайлбарын аль алинаас дүгнэж үзвэл, хоёр онгоц хөөргөх нь тодорхой бололтой.

БНЭУ руу хөөргөх тусгай үүргийн онгоцоос урьтаж Турк улс дахь иргэдээ татан авах юм байна. Одоогийн байдлаар Турк руу мөн л хоёр онгоц хөөргөхөөр төлөвөлөсөн байгаа аж.

Г.Нацаг-Эрдэнэ