Өмнөх парламентаас УИХ-ын 2020 оны ээлжит сонгуульд дахин нэр дэвшиж, улиран сонгогдоод зогсохгүй Байнгын хорооны дарга, Засгийн газрын сайдаар тодорсон эрхмүүд цөөнгүй. Тэдгээрийн нэг нь Ж.Мөнхбат гишүүн. Түүний хувьд өнгөрсөн сонгуульд Архангай аймагт нэр дэвшин ялалт байгуулж, хоёр дахь удаагаа УИХ-ын гишүүнээр ажиллах үүрэг хүлээсэн нэгэн.

МАН-ын Ерөнхий нарийн бичгийн даргаас УИХ-ын гишүүн, Засгийн газрын Хэрэг эрхлэх газрын даргаар ажиллаж байсан тэрбээр энэ удаад Боловсрол соёл, шинжлэх ухаан, спортын байнгын хорооны даргын албыг хариуцахаар болсон юм.

Тэрбээр өнөөдөр намынхаа мөрийн хөтөлбөрт тусгасны дагуу шинээр эмхлэн байгуулж, удирдлагаар нь томилсон Соёлын яамны сайд С.Чулуун, Шинжлэх ухааны акапемийн Археологийн хүрээлэнгийн захирал Г.Эрэгзэн нартай уулзаж, салбарын хууль эрх зүйн орчныг боловсронгуй болгох болон ойрын үеийн тулгамдсан асуудлаар санал солилцжээ.

Энэ үеэр ярилцсан нэг асуудал нь Кино урлагийг дэмжих тухай хуулийн төсөл. Тэрбээр УИХ-ын намрын чуулганаар хэлэлцэх 2021 оны төсвийн тухай хуульд оруулах санхүүжилт, хөрөнгө оруулалтын төслийн саналыг бэлтгэхэд анхаарч, ажлаа шуурхайлахыг мөн хүсчээ.

Төслийг одоогийн УИХ-ын гишүүн Ё.Баатарбилэг Боловсрол, соёл, шинжлэх ухаан, спортын сайдаар ажиллаж байхдаа өнгөрсөн онд өргөн барьсан байдаг.

Харин Ж.Мөнхбат гишүүний хувьд “Долоон бурхан харвадаггүй”, “Бүү март” гэсэн хоёр түүхэн киног “Хүмүүн” фильмтэй хамтран бүтээж, зохиолчоор нь ажилласан нэгэн. Улмаар төр, нийгмийн зүтгэлтэн, Монгол Улсын маршал агсан Юмжаагийн Цэдэнбалын тухай “Түүх мартахгүй” бүтээлийг туурвиж, энэ оны дөрөвдүгээр сард олон нийтийн хүртээл болгосон удаатай.

Монгол Улс, ОХУ, БНХАУ, БНЭУ-ын жүжигчид, уран бүтээлчид оролцож, ерөнхий продюссер, зохиолчоор Ж.Мөнхбат, ерөнхий найруулагчаар А.Мөнхсүх нар ажилласан уг кинонд зориулж, Засгийн газрын хуралдаанаар 500 сая төгрөгийг нөөц сангаасаа гаргахаар шийдвэрлэж байсан юм.

Тэгвэл энэ удаад гишүүн Ж.Мөнхбат Соёлын сайд С.Чулууныг дуудан уулзаж, дэмжлэг хүссэн нь учиртай.

Үүнийг нь Байнгын хорооны даргын эрхлэх асуудлын хүрээнд хэмээн зөөллөж буй ч Ж.Мөнхбат гишүүн өнгөрсөн хугацаанд зохиолч, ерөнхий продюссероор нь ажилласан гурван уран бүтээлээ төрд данслуулахаар зүтгэж эхэлсэн нь энэ бололтой. Агуулга, автор нь "Кино урлаг" гэсэн том малгайг хамаарч буй ч гишүүн Ж.Мөнхбат Байнгын хорооны даргын хувиар Соёлын сайдыг дуудаж уулзсанаа хуулийн төсөл ийнхүү зүтгүүлэхээр шийджээ.

Учир нь, түүнтэй хамт Архангай аймгаас сонгогдсон Ё.Баатарбилэг сайд байхдаа өргөн барьсан хуулиар ТӨСӨЛД:

-Кино урлагийн мэдээллийн сан бүрдүүлэх;
-Үндэсний соёл, түүх, өв уламжлалыг эергээр харуулсан монгол агуулга бүхий киног төрөөс дэмжих;
-Кино урлагаар дамжуулан Монгол Улсаа сурталчлах;
-Үндэсний бахархал, эх оронч сэтгэлгээг хөгжүүлэхэд чиглэсэн бүтээлийн сонгон шалгаруулалт явуулах, төсвийн хөрөнгөөр бүтээх кинонд тавих шалгуур үзүүлэлтийг тогтоох;
-Монгол киноны чанарыг сайжруулах, техник технологийн шинэ ололт амжилтыг нэвтрүүлэх, уран бүтээлчдийг олон улсын шилдэг чиг хандлага, арга барилд суралцуулах, киноны мэргэжилтнүүдийг бэлтгэх, сургах зэргээр уран бүтээлчдийн хөгжлийг дэмжих;
-Монгол Улсын нутаг дэвсгэрт гадаадын кино үйлдвэрлэгч нар зураг авалт хийх үйл ажиллагааг зохицуулах зэрэг асуудлууд тусгаад байгаа юм. 

Г.Эрхэс