Инновац, цахим бодлогын байнгын хорооноос өнөөдөр "Тоон гарын үсгийн цахим хэрэглээ, төрийн байгууллага хоорондын албан бичиг солилцоо” сэдэвт хэлэлцүүлгийг Төрийн ордонд зохион байгууллаа.
Улсын Их Хурлын 2020 оны 5 дугаар сарын 13-ны өдрийн 52 дугаар тогтоолоор “Алсын Хараа 2050” Монгол улсыг хөгжүүлэх урт хугацааны бодлогыг баталсан бөгөөд тус хөтөлбөрт “Сайн засаглал”-ыг бий болгох зорилгын хүрээнд ухаалаг засаглал, ухаалаг бүтэц, цахим монгол-иргэн төр хувийн хэвшлийн нэгдсэн систем гэсэн сэдвийн дор тодорхой бодлогуудыг нэг бүрчлэн тодорхойлж батлаад байна.
Төрийн албан бичиг солилцоо болон архивын үйл ажиллагаа нь нарийн дэг журам, тодорхой хэмжээний нууцлалтай байх ёстой тул бидэнд мэдээллийн аюулгүй байдал, системийн дархлаа, түүнийг хэрэгжүүлж хэвших төрийн албан хаагчдын үйл ажиллагааны хэвшил, ёс зүй гээд олон асуудал урган гарч ирнэ. Төрийн албан бичиг солилцоо, архивын үйл ажиллагаанд цахим шилжилтийг хэрэгжүүлэхэд үндсэн бааз, дэд бүтцийг ярилцахын хажуугаар өмнө дурдсан нөхцөл байдлуудыг бид хэзээ ч орхигдуулж болохгүй.
Төрийн бүх шатны байгууллагууд гэхэд л нэг өдөрт 500-600 боодол буюу 250-300 мянган хуудас цаас ашиглаж байна гэсэн албан бус тооцоолол байна. Энэ тоон үзүүлэлтээс харахад наанадаж байгаль экологид сөрөг нөлөөг төдий хэмжээгээр үзүүлж байгаа бол, цаанадаж төрийн албан хаагчдын ажлын ачаалал, бүтээмжийн хоргодол, түүн дээрээс үүдсэн төрийн албаны хүндрэл чирэгдэл гэсэн асуудлуудыг шууд нөлөөллөөр бий болгож байна.
