Орон нутгийн сонгуулийн сурталчилгаа эхлээд гурав дахь өдрөө үргэлжилж байна. Сонгуулийн сурталчилгааны хугацаа 15 хоног. Уг хугацаанд багтаж нэр дэвшигчид нутаг орноо хөгжүүлэх менежмент хөтөлбөрөө сонгогчдодоо танилцуулах, хэн илүү өөрийгөө сурталчилж чадсан нь санал авч чадна.

Энэ жилийн хувьд орон нутгийн сонгуульд 800 нэр дэвшигч өрсөлдөнө. Нам, эвслийн анхан болон дунд шатны нэгжийн төлөөлөл, бие даан нэр дэвшигчдээс сонголтоо хийхдээ мөрийн хөтөлбөртэй нь сайтар танилцахыг зөвлөе.

Учир нь бидний сонголтоос орон нутгийн цаашдын хөгжил, бүтээн байгуулалт, үйл ажиллагаа шалтгаалах юм.

Түүнчлэн орон нутгийн сонгуульд өрсөлдөх мандатаа авч, сурталчилгааны хоногоо эхлүүлсэн болон эрхээ авч чадаагүй гомдогсдын бүлэг үүсээд буй. Заримынх нь хувьд сонгуульд оролцох эсэх нь шүүхийн шийдвэрээс хамаарна.

Тодруулбал, нийслэлийн Сонгуулийн хорооноос ХҮН-ынхныг нийслэлийн Иргэдийн төлөөлөгчдийн сонгуульд бүртгэх боломжгүйг зарлажээ. Харин дүүрэгт нэр дэвшигчдийг нь бүртгэсэн байна.

Үүссэн асуудлыг ХҮН-ынхан эрх баригч нам болон АН-тай холбон үзэж, биднийг сонгуулиас шахан гаргаж зорилгоо биелүүлж байна гэж дүгнээд буй. Уг асуудалтай холбогдуулан жагсаал зохион байгуулаад ч амжсан. Цаашид шүүхийн шийдвэрээс хамаарч Төрийн ордонд тэмцлээ үргэлжлүүлэхээ мэдэгдсэн.

Угтаа бол Нийслэлийн Сонгуулийн хорооноос бүртгэх боломжгүй болсон шалтгаан нь ХҮН-ын өөрсдийн гаргасан шийдвэр, дотоод тэмцэлтэй холбоотой. Тодорхой хэлбэл, тус намын Удирдах зөвлөлийн дарга, УИХ-ын гишүүн Т.Доржханд нийслэлийн намын даргын албан үүргийн П.Наранбаярт шилжүүлэхийн тулд 2018 оны наймдугаар сард намын анхан болон дунд шатны байгууллагаа өөрөө татан буулгаж, энэ оны наймдугаар сард дахин байгуулсан байдаг.

Энэ нь Аймаг, нийслэл, сум, дүүргийн иргэдийн төлөөлөгчдийн хурлын сонгуулийн тухай хуулийн 6.1 дэх заалттай харшилдсан хэрэг.

Хуульд зааснаар намын анхан болон дунд шатны нэгжээ орон нутгийн сонгуулийн өдрийг товлон зарлахаас өмнө байгуулах ёстой. Асуудлын гол нь ердөө л энэ. Тэдний эрх мэдлийн төлөөх “зодоон” л ийм үр дүн хүргэв бололтой. 

Дараагийн гомдогсдын эгнээ Дархан-Уул аймаг дахь АН-аар үргэлжилнэ. Тэдний хувьд мөрийн хөтөлбөрөө аймгийн Сонгуулийн хороондоо хүргүүлэхдээ хандивын дансаа тусгаагүй. Улмаар аймгийн Аудитын газраас нь орон нутгийн сонгуульд оролцох боломжгүй гэж дүгнэжээ.

Энэ жилийн орон нутгийн сонгууль ийм хэдэн гомдогсодтой. Ер нь бидэнд байдаг дутагдалтай ганц зүйл нь бурууг бусдаас эрэхэд л байх шиг. Сонгууль болдогоороо болно. Харин намчирхалгүй л сонголтоо хийчихдэг байхад л болно доо. 

Б.Лхам