Энэ удаагийн парламент 13 эмэгтэй гишүүнтэй.  Тэд саяхан нам харгалзахгүйгээр УИХ дахь эмэгтэй гишүүдийн бүлэг байгуулж буй талаараа мэдээлж, нийгэмд тулгамдсан ядуурал, архидалт, хүчирхийлэл, хүүхэд, эмэгтэйчүүдийн эрх, тэднийг хамгаалах зэрэг арван чиглэлд голлон анхаарч ажиллахаа хэлж байв. Гэтэл өнөөдрийг хүртэл эмэгтэй гишүүдийн санаачилсан хуулийн төсөл, хэлсэн үг, хийж буй үйлдэл шүүмжлэл дагуулсаар ирлээ. Ямар сайндаа л Монгол Улсын Ерөнхийлөгч намрын чуулганы нээлтэд “Юун архины савлагаа, юун дээлний хээ” хэмээн дуу алдаж байх вэ. Үүнд П.Анужин гишүүн “Архины сав биш л дээ архидалт, дээлний хээ биш л дээ төрийн ёслол хүндэтгэлийг хөндсөн” хэмээн эгдүүцлээ илэрхийлсэн билээ.

Эмэгтэй гишүүд Архидан согтуурахтай тэмцэх тухай хуульд нэмэлт өөрчлөлт оруулах тухай хуулийн төсөл санаачилснаа зарлаж, энэ тухай гишүүн М.Оюунчимэг, Б.Жаргалмаа нар Төрийн ордонд мэдээлэл хийсэн юм.

Тэд ням гаригт согтууруулах ундаа худалдаалахыг хориглож, 5000 хүн амд архины нэг цэг байх нь зохимжтой гэж мэдэгдэж байв. Гол нь тэд цаг үеэ мэдрээгүй юм. Энэхүү мэдээлэл хийхтэй давхцан Сүхбаатарын талбайд олон эцэг, эх хүүхдийн хүчирхийллийн эсрэг дуу хоолойгоо өргөн жагсаал зохион байгуулж байв.

Хамгийн сүүлд гэхэд л Баянхонгор аймгаас УИХ-д сонгогдсон гишүүн Б.Адьяасүрэн “Төрөөс мөнгөний бодлогын талаар 2021 онд баримтлах үндсэн чиглэл батлах тухай” УИХ-ын тогтоолын төслийг хэлэлцэх үеэр Монголбанкны Ерөнхийлөгчөөс “Малчдын амьдрал хүнд байна. Ноолуурын үнэ өсөөгүй, гантай байснаас Баянхонгор аймгийн малчид зээлээ төлж чадахгүйд хүрээд байна. Баянхонгор аймгийн малчдын зээлийн төлөлтөд уян хатан хандах, тусгайлсан мөнгөний бодлого хэрэгжүүлэхэд арилжааны банкуудад дэмжлэг үзүүлэх боломж байгаа юу" гэж асуусан нь олон нийтийн сүлжээнд өнөөдрийг хүртэл сэдэв болж байна. Тодруулбал, зөвхөн өөрийн сонгогдсон тойрогтоо хамаатуулж асуусан нь шүүмжлэл дагуулаад байгаа юм. Энэ мэтчилэн эмэгтэй гишүүд хөндөх, сэвэх сэдвийнхээ өнцгийг нэг л олохгүй. Оллоо гэж бодсон нь шүүмжлэлийн “бай” болж байгаад анхаарах биз ээ.

У.Тэргэл