Автомашины азын дугаар тухайн хүний бэл бэнчинг илтгэх болсон. Тиймээс ч иргэд хошуурах болж, үүнийг дагаад авлига, хээл хахуулийн хэрэг өссөн билээ. Мөн Авто тээврийн үндэсний төвийн мэргэжилтэн, удирдлагуудын халаасаа зузаатгах нэг арга нь энэ болоод байсан юм. АТҮТ-ийн газар, хэлтсийн дарга, мэргэжилтнүүд  хагас жилийн хугацаанд азын 3000 дугаарыг бусдад олгохдоо 500 мянгаас таван сая хүртэлх төгрөгийн хахууль авсныг АТГ-аас илрүүлэн шалгаж байна.

Автомашины улсын дугаарын шинэ сери задрахад 300 орчим нь хос дугаар гарч ирдэг байна.  Энэ байдлыг халахын тулд АТҮТ-өөс ижил тоотой дугаарыг зөвхөн хүн, мал эмнэлгийн шуурхай албаны, түргэн тусламжийн, засвар, арчлалт, тохижилт үйлчилгээний тусгай зориулалтын тээврийн хэрэгсэлд олгохоор болсноо мэдэгдсэн.

Гэвч энэ нь иргэдийн шүүмжлэлтэй тулж, азын дугаарыг дуудлага худалдаагаар зарсан нь дээр. Боломжтой нэг нь аваг гэсэн санал олноор гарч байлаа.

Тэгвэл холбогдох байгууллагууд энэ асуудлыг дахин хэлэлцсэнээр автомашины азын дугаарыг дуудлага худалдаагаар борлуулахад санал нэгджээ. Үүнээс олсон орлогыг замын түгжрэлийг бууруулах, хөгжлийн бэрхшээлтэй иргэдэд зориулсан налуу зам барих, гэрлэн дохио, камержуулалт гээд хэрэгцээт зүйлд зарцуулахаар ярьж эхэлжээ. Азын дугаарын үнэ ханшийн дээд, доод хязгаарыг Сангийн яамтай ярилцан, шийдвэрлэх аж.

У.Тэргэл