Коронавирустэй өвчтөнг эмчилж буй эмч нар хангалттай эсэх болон өвчилсөн эмч нарын талаар ХӨСҮТ-ийн Тандалт, судалгааны албаны дарга А.Амбасэлмаа "Манай эмч нар анх 2020 оны гуравдугаар сарын 10-наас эхэлж коронавирустэй өвчтөнг эмчилж эхэлсэн. ХӨСҮТ-ийн эмч н.Чинбаяр анхны тохиолдлыг эмчилсэн. Бусад эмч нартаа заавар зөвлөгөө өгч, эмч нараа дадлагажуулж ажиллаж байна. Нэг баг дөрвөн хүний бүрэлдэхүүнтэй ажилладаг. Одоо 10 баг ажиллаж байна. ХӨСҮТ-ийн халдвартын эмч нар бүгд оролцож ажиллаж байна. Эмчилгээ олон улсын жишгээр явж байгаа. Эмчилгээгээ тухай бүр өөрчилж, дэлхийн жишигтэй нийцүүлж ажилладаг. 

Өвчтэй хүмүүст вирусийн эсрэг арбитол, лановер, ремдесевир зэрэг эм хэрэглэж байна. Мөн дархлаа дэмжих эмчилгээ хийж байна. Уушгины хатгаатай бол антибиотик эмчилгээ хийж байна. Батлагдсан тохиолдол бүрийг өдөрт нь мэдээлж байгаа. 

ХӨСҮТ-д одоогоор 10 хүн халдвар авсан. Дэлхий нийтийн жишгээр эрүүл мэндийн ажилчид өвдөх эрсдэл маш их байна. Халдварын голомтод ажиллаад халдвар авах эрсдэлийг мэргэжлээс шалтгаалах өвчинд тооцдог. Гэхдээ бид өвдөх ёстой гэж байгаа юм биш. Олон хоногоор ажиллах, хамгаалах хувцастай удаан байх, бусад шалтгаанаар халдвар авах эрсдэл байж болно. Дэлхий дахинд өвчилсөн өвчтөнтэй нь харьцуулахад 10 хувь нь халдвар авсан гэсэн судалгаа бий. Бид энэ асуудалд дүгнэлт хийж цаашдаа халдварыг гаргахгүй байхын төлөө, эмч ажилчдаа өвчлүүлэхгүйн төлөө тал талын арга хэмжээ хэрэгжүүлж байна. Ер нь ХӨСҮТ 200-гаад эмчтэй. 10 баг ээлжээр орж ажиллаж байна. Эмч нарын 2 баг өвчилөөд тусгаарлагдсан. Гэхдээ нөхөж эмч нараа ажиллуулж байгаа" гэлээ.

Б.Баатар