Нийгмийн Эрүүл мэндийн үндэсний төвийн захирал Д.Нарантуяа "Коронавирус хүндэрсэн үедээ амьсгалын замын хүндрэлийг үүсгэж, олон системийг доголдуулдаг. Ийм учраас хөл хорионы дэглэмийг хатуу барих нь зөв гэж үзэж байна. Хэрэв хатуу хөл хорио тогтоогоогүй бол долоо хоногийн дараа 555, цаашлаад халдвар авах хүний тоо 2000 орчим болж өсөх хандлагатай байх тандалт хийсэн.
Манай улсын хүн амын дөрвөн хувь нь ямар нэгэн халдварт өвчнөөр өвдөх эрсдэлгүй гэсэн судалгаа гарсан. Ихэнх хувь нь халдварт өвчнөөр өвдөх эрсдэлтэй гэсэн үг. 11 хоногийн хөл хорионы үеэр лабораторийн шинжилгээг 110 мянган хүнд хийлээ. 18 цэгт 25644 хүнд тандалт байдлаар түргэвчилсэн оношлуураар шинжилгээ хийсэн.
Батлагдсан тохиолдол болох 146 хүний ойрын хавьтал болох 700 хүнийг бүрэн шинжилгээнд хамрууллаа. Хоёрдахь хавьтлуудад шинжилгээ хийгээд явж байна. Одоогоор бид тандалтын зураглалтай болсон учраас хөл хориог тодорхой байдлаар багасгаж болно гэсэн зөвлөгөөг эрдэмтдийн зүгээс өгч байна.
Манай улс өмнө нь төрөл бүрийн халдварт өвчинтэй нүүр тулж байсан. Харин коронавирус нь шинэ вирусээр үүсгэгдсэн гэдгээрээ л онцлогтой. Гэхдээ бид энэ өвчний эсрэг хариу арга хэмжээ авч чадаж байгаа” гэлээ.
Б.Баатар
