УИХ-ын чуулганы танхимд гишүүдийг халдвар хамгааллын дэглэм баримтлуулж, шилэн хаалт, хорго байрлуулсан нь олны дургүйцлийг төрүүлж буй талаар бид өмнө нь мэдээлсэн билээ. Тэгвэл гишүүдийн шилэн хаалт болох хоргыг буцаагаад хураажээ. Энэ нь ямар шалтгаантай болохыг албаныхан одоогоор мэдээлээгүй байгаа юм.

Ямартай ч шилэн хорго нь олон нийтийн шүүмжлэлтэй тулгарсан тул ийнхүү хураасан байхыг үгүйсгэхгүй юм.

Уг нь УИХ-ын дарга Г.Занданшатар "Солонгос, Грек, Энэтхэг гээд олон улсын парламентууд шилэн хаалт тавиад хурлынхаа үйл ажиллагааг явуулж байна. Энэ жишгээр эдийн засгаа уналтад оруулахгүйн тул үйлчилгээний газрууд  ч шилэн хаалт хэрэглэж, хамгаалж, үйл ажиллагаагаа явуулж байна. Энэ жишгээр УИХ үлгэрлэн харуулах зорилгоор шилэн хаалт тавьсныг зарим хүмүүс эсэргүүцэж байна. Урьдчилан сэргийлэх, хамгаалах бүхий л үйл ажиллагааг олон улсын туршлагад суурилан нэвтрүүлж, ажлаа хэвийн үргэлжлүүлэх хэрэгтэй. Дэлхий нийтийн сайн туршлагыг авч хэрэгжүүлж байна” хэмээн мэдэгдсэн.

Гэвч төд удалгүй шилэн хаалтаа хурааж, чуулганы танхимын гадна гаргаад “хаяжээ”. Уг шилэн хаалтын нэг бүрийн үнэ нь 180 мянган төгрөг бөгөөд нийтдээ 15 сая төгрөг зарцуулсан гэх албан бус мэдээлэл байна.

Угтаа нэгэнт хийж, хөрөнгө мөнгө зарцуулсан шилэн хаалтаа авч, дахин шүүмжлэлд өртөхийн оронд энэ жишгээр үлгэрлэсээр бусад аж ахуй нэгж, худалдааны байгууллагадаа нэвтрүүлсэн бол үр дүн нь гарч, сайшаах хүн олон байлаа.

Гэвч улстөрчид цахим сүлжээнд өрнөх, шүүмжлэлд ихээхэн ач холбогдол өгч, олны хэл амнаас айж, эргэж буцсан шийдвэр гаргаасаар байгаа нь харамсалтай.

Төрийн ажил хийж, улс эх орноо удирдаж буй хүмүүс иргэдийнхээ санал шүүмжлэлийг сонсч, ажил хэрэгтээ тусгахаас бус, хэлж, шүүмжлэх тоолонд нь хийж хэрэгжүүлж байгаа ажил, цаасан дээр буулгасан тушаал шийдвэрүүдээ алга эргүүлэх төдийд буцааж, хүчингүй болгоод байх нь зохисгүй үйлдэл гэдэгтэй санал нийлэх хүн олон байна.

Нэр төр, алдар хүндээ унагахгүй гэх өчүүхэн бодолд автаж, худал “попрох” нь эргээд асар их хор уршиг дагуулж мэдэх. Тиймээс эрхэм түшээд хийгээд төрийн нэрийн өмнөөс ажиллаж буй эрхмүүд үг дааж сурна гэж нэг зүйл байдгийг санаж, альваа зүйлд шинжлэх ухааны үндэслэлтэй, ул суурьтай хандах нь чухал болохоос сошалын шүүмжлэлийг дагаж, намираад байвал ажил урагшлахгүй гэдгийг санаж явахад илүүдэхгүй юм.

Б.Баатар