Монгол Улсын Ерөнхийлөгч асан Ц.Элбэгдорж Ерөнхийлөгчид нэр дэвших боломжтой хүмүүсийг нэрлэжээ. Харин түүний онцолсон хүмүүс нь өнөөх өмнө нь жиргээд байсан улстөрийн хоригдлууд нь байх аж.

Тодотговол, тэрбээр "Ерөнхийлөгчид хэн дэвших. Олон хүн санаагаа чилээж. Би бол АН-М.Энхсайхан, МАН-С.Баяр. Магад гэж хорьсон ч юм билүү. Төр Элчин хийж байхад нь дуудсан, гаргаад ирж бас чадна. Шоронгоос сонгогдсон Ерөнхийлөгч дэлхийд бна. Сонгогдсон гишүүн манайд ч бна. Эцэст нь ард түмэн л шийднэ" хэмээн цахим хуудснаа бичжээ. 

Түүнийхээр Ерөнхийлөгчийн сонгуульд нэр дэвших боломжит хувилбар нь МАН-аас Ерөнхий сайд асан С.Баяр, АН-аас мөн л Ерөнхий сайд асан М.Энхсайхан нар байсан ажээ. Гэхдээ энэ нь түүний л хүсэж байгаа хувилбар болохоос биш боломжит хувилбар биш юм. Учир нь, Ерөнхийлөгчийн сонгуулийн тухай хуульд “Шүүхийн хүчин төгөлдөр шийтгэх тогтоолоор ял эдэлж байгаа” хүнийг Ерөнхийлөгчийн сонгуульд нэр дэвшихийг хориглосон байдаг. Тэгэхээр Ерөнхийлөгч асны нэрлэж байгаа хоёр “нэр дэвшигч” нь хуулиараа хориотой хүмүүс юм.

Ерөнхий сайд асан С.Баяр "Монгол Улсын Ерөнхий сайдаар ажиллаж байхдаа Монгол Улсын Засгийн газрын 2009 оны аравдугаар сарын 6-ны өдрийн “Гарын үсэг зурах эрх олгох тухай” 308 дугаартай тогтоолоор стратегийн орд болох Оюутолгой төслийн хүрээнд Айвенхоу Майнз Монголия Инк, Айвенхоу Майнз Лимитед, Рио Тинто Интернэшнл Холдингс Лимитед компаниудтай хөрөнгө оруулалтын гэрээг үзэглэх эрхийг нэр бүхий Засгийн газрын гишүүдэд олгож, мөн өндөр хөрөнгө оруулалтын гэрээ байгуулах нөхцөл бүрдүүлсэн" гэх үндэслэлээр анхан шатны шүүхээс таван жилийн хорих  ял оноосон.

Харин Нийслэлийн Эрүүгийн хэргийн Давж заалдах шатны шүүх Чингэлтэй дүүргийн эрүүгийн хэргийн анхан шатны шүүхийн шийдвэрт өөрчлөлт оруулан С.Баярт оноосон таван жилийн хорих ялыг өөрчлөн 2 жил зургаан сар болгон бууруулсан байдаг. Харин тэд Дээд шүүхэд гомдол гаргаагүй.

Харин М.Энхсайханы хувьд мөн л гурван шатны шүүхээр хэрэг нь хэлэлцэгдэж, хорих ял эдлэж буй. Тодруулбал, Улсын Дээд шүүх Анхан болон давж заалдах шатны шүүх М.Энхсайханыг "Монгол Улсын сайд, Засгийн газрын гишүүн, Тавантолгойн нүүрсний ордод хөрөнгө оруулагчийг сонгох нээлттэй уралдаант шалгаруулалтыг зохион байгуулах, шалгарсан этгээдтэй хэлэлцээ хийж, холбогдох гэрээ байгуулах үүрэг бүхий ажлын хэсгийн ахлагчаар ажиллаж байхдаа эрх мэдэл, албан тушаалын байдлаа урвуулан ашиглаж, нэр бүхий компаниудад эдийн засгийн давуу байдал бий болгосон" гэх хэргийг төгссөн гэж үзсэн нь үндэслэлгүй, харин дээрх гэмт хэргийг үйлдэхээр завдсан гэж дүгнэж, М.Энхсайханд оногдуулсан ялыг нийтийн албанд томилогдох эрхийг 4 жилийн хугацаагаар хасаж, 4 жил хорих болгон өөрчилж, бусад шийдвэрийг хэвээр үлдээж шийдвэрлэсэн байдаг юм.

Ташрамд дурдахад, Ерөнхийлөгч асан Ц.Элбэгдорж өнгөрсөн оны арванхоёрдугаар сард 14 хүнийг улс төрийн хоригдол хэмээн тодорхойлж, тэдэнд өршөөл үзүүлэхийг Ерөнхийлөгч Х.Баттулгаас хүсэж байсан билээ. Гэхдээ албан ёсоор бус. Өөрийн цахим хуудаснаа “Улс төрийн хоригдол 14 хүнд уучлал үзүүл. Үндсэн хуулиар зөвхөн Ерөнхийлөгчид олгосон бүрэн эрх юм. Элдэв журам, тайлбараар шалтаглах хэрэггүй. Төрийн тэргүүнийу учлалаас илүү хүчтэй эрхзүй гэж байхгүй. Хэлмэгдсэн, алдаж эндсэн бусдыг нь 100 жилийн өршөөлд УИХ хамруулаг" хэмээж байсан юм.

Б.Баатар