Монгол Улсын зургаа дахь Ерөнхийлөгчийг тодруулах ээлжит сунгаа болоход ердөө сар орчмын хугацаа үлдлээ. Дараагийн Ерөнхийлөгч манай улсын зургаа дахь төрийн тэргүүн болоод зогсохгүй Үндсэн хуулийн өөрчлөлтөөр зургаан жилээр сонгогдохоороо онцлог юм.

Ээлжит сонгуульд УИХ-д суудалтай гурван намаас нэр дэвшиж байна. нэр дэвшигчид өчигдөр Үндэсний Аудитын газар мөрийн хөтөлбөрөө хүргүүлсэн. Тэдний мөрийн хөтөлбөрт хийсэн дүгнэлийг ирэх лхагва гарагт танилцуулах ёстой. Хэрэв мөрийн хөтөлбөр нь хуульд заасан шаардлагыг эс хангавал засварлаад дахин нэг удаа ирүүлэх боломж олгодог.

Ерөнхийлөгчийн сонгулийн гол үйл явдал нь АН-аас хоёр хүн нэр дэвшүүлсэн явдал. Тодруулбал, хоёр хэсэг хуваагдсан тус нам тал талд нэг нэг хүн сонгож, нэр дэвшүүлэхээ зарлаад байгаа. Энд үүсээд буй гол асуудал нь тус нам албан ёсны нэр дэвшигчгүй үлдэх магадлал тун өндөр байгаа юм.

Асуудлыг нарийвчилбал, нэр дэвшээд буй хоёр хүнээс хэнийг нь Сонгуулийн ерөнхий хороо бүртгэх нь олон нийтийн анхаарлын төвд байна. Мэдээж нэгийг нь бүртгэхэд нөгөө нь гомдож таарна. Гомсон нэг нь М.Тулгат эсвэл О.Цогтгэрэл манай намын албан ёсны дарга учраас тэр нэр дэвшигч албан ёсных хэмээн шүүхэд хандах эрхтэй. Шүүхэд хандлаа гэхэд шүүхийн шидвэр гарах хүртэл уг асуудал даамжирна. Улмаар АН албан ёсны нэр дэвшигч ч үгүй хоосон үлдэж, сонголтгүй сонгууль болох вий гэсэн болгоомжлол үүсээд байгаа юм.

Ер нь АН эрээвэр, хураавар улстөрчдийн цуглуулга, “орогнох” газар нь болсон мэт иргэд, сонгогчдод нь эргэлзээ үүсэж байна. Тухайлбал, өнгөрөгч УИХ-ын ээлжит сонгуулийг угтаж МАХН-аас нэр дэвшиж, ялалт байгуулсан гишүүн асан О.Баасанхүү, бие дааж нэр дэвшсэн гишүүн асан С.Жавхлан нар АН-тай гар барьж, иргэд сонгогчдынхоо сонголтыг “гишгэлж” байсан гэхэд хилсдэхгүй. Сая УИХ-ын хоёр гишүүн тус намд элслээ. Үүнээс үзэхэд АН лидергүй болсноор эрээвэр, хураавар улстөрчдийн цуглуулга болж хувирчээ.

А.Сүх