Гамшгийн бэлэн байдлын зэрэглэлийг өнөөдрөөс нэг шат бууруулж, өндөржүүлсэн бэлэн байдлын зэрэгт шилжиж буй. Энэ нь халдварын голомт хумигдаж, коронавирусний аюул холдсон гэсэн үг биш. Тиймээс хөл хориог сулруулсан ч иргэдийг халдвар хамгааллын дэглэмээ баримталж, дархлаажуулалтдаа идэвхитэй хамрагдахыг албаныхан хэлж анхааруулж байгаа.
Өнгөрсөн 24 цагийн хугацаанд 815 хүнээс коронавирус илэрч, манай улсын нийт батлагдсан тохиолдол 44016 болсон. Үүгээр ч зогсохгүй коронавирусний халдварын улмаас нийт 160 хүн нас барсан харамсалтай мэдээ байна. Коронавирусний цар тахалын улмаас энэ мэтээр халдвар авч, улмаар амь насаа алдах эрсдэл өндөр байсан хэвээр байгаа юм.
Коронавирусний халдвараар өвчилсөн иргэд сэтгэл санааны цочиролд орж, сэтгэцэд өөрчлөлт орох, айдас түгшүүрт авдах тохиолдол ч олноор гарч байгаа аж.
Тухайлбал, халдвар авснаа мэдсэн даруйдаа айж, шоконд орох, бусдад халдвар дараасан эсэхдээ эмзэглэх, хэн нэгэнд халдвар тараасны улмаас тухай хүн нь амь насаа алдахад гэмшиж, гутрах, үүнээсээ үүдэж сэтгэл санааны цочиролд орж, сэтгэцэд өөрчлөлт орох зэрэг шинж тэмдэг илэрч байгаа гэдгийг ч албаныхан хэлж анхааруулж байгаа юм.
Түүнчлэн коронавирусний халдварын улмаас дэлхий дахинаа эхийн эндэгдэл, дутуу төрөлт ч нэмэгджээ. Энэ талаар АШУҮИС-ийн багш Д.Мөнхцэцэг “Коронавирусний халдварт өртөх хамгийн эрсдэл бүхий хүнд ахмад настан, таргалалт, чихрийн шижин өвчтэй, жирэмсэн эмэгтэйчүүд багтдаг. Тухайлбал, жирэмсэн эмэгтэйчүүдэд бие махбодийн олон тооны өөрчлөлт гарна. Эхийн хэвлийд байгаа ургийг хэвийн бойжуулахын тулд жирэмсэн эмэгтэйчүүдийн дархлалын систем буурдаг. Энэ бүх нөхцөл вирус биед орох маш эрсдэлтэй гэж үзэж байгаа.
Дэлхий дахинаа коронавирусний улмаас эхийн эндэгдэл, дутуу төрөлт нэмэгдэж байна. Судалгаанаас харахад цар тахлаас өмнө эхийн эндэгдэл 168,295 байсан бол өнөө үед 198,993 болж нэмэгджээ. Мөн төрсний дараа эмэгтэйчүүдэд хөнгөн хэлбэрийн сэтгэл гутрал байдаг. Өнөөгийн судалгаагаар төрсний дараа бус жирэмсэн үед сэтгэл гутрал их байгаа.
Манай улсад хэвтэн эмчлүүлсэн жирэмсэн болон төрсөн 98 эхийг судлахад 50 хувьд нь уушгины хатгалгаатай байсан. Мөн хоёр нярайгаас халдвар илэрсэн. Одоогийн байдлаар 119 жирэмсэн , төрсөн эхчүүд халдварын улмаас төрөх тасгуудад эмчлүүлж байна” гэдгийг онцолсон.
Тиймээс хайртай дотны хүнээ эрсдэлд оруулахгүйн тулд халдвар хамгааллын дэглэмээ баримталж, хүн олноор цугларсан газруудаар явахгүй, хүн хоорондоо зайгаа барьж, шаардлагагүй тохиолдолд айлаар зочилж, хүн урихгүй байх шаардлагатай юм.
Б.Баатар
