ТУСГААР ТОГТНОЛЫН БАЯРТ БАРЬСАН ОХУ-ЫН “БЭЛЭГ”

Мөнхийн хоёрхон хөрштэй манай улсын гадаад харилцаа, эдийн засагт маш чухал дохио авчирсан амралтын өдрүүд өнгөрлөө. Анхдугаар Үндсэн хуулиа баталж, улсаа тунхагласны ой тохиосон өнгөрсөн баасан гараг бидний хувьд албан ёсны амралтын өдөр байв. Харин тасралтгүй үргэлжлэх гадаад харилцаан дахь анхаарал татсан үйл явдал нь Монгол Улс-ОХУ-ын Засгийн газар хоорондын комиссын эдийн засаг, шинжлэх ухаан, технологийн асуудлаархи ажлын хэсгийн хуралдаан Монгол Улсын Төрийн ордонд болсон нь байлаа. Монгол Улсын хэвлэл мэдээлллийнхэнд хаалттай өрнөсөн уг хуралдаанаас гарсан шийдвэрүүдийн талаар ОХУ-ын Засгийн газрын орлогч В.Абрамченко ОХУ-ын хэвлэл мэдээллийн хэрэгслээр ярьснаар бол,

-Манай улсыг Эгийн гол дээр усан цахилгаан станц барихыг ОХУ-ын Засгийн газар зөвшөөрөхгүй.

-Эгийн голын усан цахилгаан станцын талаар ирэх онд ОХУ-ын Казань хотод ЮНЕСКО-гийн төлөөлөгчдийг оролцуулан хурал зохион байгуулахаар төлөвлөсөн.

-Эгийн голын усан цахилгаан станцыг барих саналаас Монгол Улс татгалзсан нөхцөлд ОХУ нэмэлт цахилгаан, эрчим хүчийг Монгол Улсад нийлүүлэх боломжтой гэдэг саналуудаа ОХУ илэрхийлжээ.

Эндээс харахад Монгол Улсын эрчим хүчний гол эх үүсвэр болох боломжтой Эгийн голын усан цахилгаан станцыг дэмжихгүй гэж мэдэгдсэн Байгаль орчны яамныхаа байр суурийг ОХУ хоёр улсын Засгийн газар хоорондын комиссын хурал дээр бататгаад явсан байна. В.Абрамченкогийн мэдээллээс үзэхэд Казаньд болох хурлаар ОХУ Эгийн голын усан цахилгаан станцын төслийг бүрэн зогсоохоор төлөвлөж байгаа гэдэг нь харагдаж байна. Мэдээж энэ төслөөс татгалзсан тохиолдолд ОХУ манай улсад шаардлагатай эрчим хүчийг “нийлүүлнэ” гэж байгаа нь “худалдана” гэсэн үг. Нэг зүйлийг зориуд тодотгоход ОХУ-аас манай улс эрчим хүч импортолдог ганц шугам нь хуучирсан, дамжуулах техникийн боломж хязгаарлагдмал, дээд цэгтээ хүрчихсэн байгаа билээ. Харин Эгийн голын усан цахилгаан станцын төслийн ТЭЗҮ, дэд бүтцийн зураг төслийг нь хийгээд, санхүүжилтийн зээлийг нь БНХАУ-ын Экзим банкнаас авахаар шийдчихсэн байв. Энэ төслийг хэрэгжүүлж чадвал манай улсын стратегийн чухал салбар, эрчим хүч гаднын улсаас хараат байхаа болих билээ. Харамсалтай нь, анхдугаар Үндсэн хуулиа баталж, тусгаар тогтнолоо баталгаажуулсан баярын өдрөөр ОХУ Монголын эрчим хүчний салбарт ийм “бэлэг” барьчихаад буцлаа.

ТӨМӨР ЗАМЫН ЭКСПОРТЫН 0 ЗОГСОЛТ БУЮУ ДАХИАД Л ЭРЭЭН БООМТЫН БОЙКОТ

Монголчуудын хувьд энэ амралтын өдрөөр дахин нэг муу мэдээ сонссон нь БНХАУ-ын Эрээн боомтын төмөр замын тээврийг тодорхойгүй хугацаагаар зогсоох тухай байлаа. Омикрон хувилбар дэлхийд тархаж байгаатай холбоотойгоор “Эрээн хотын Шинэ коронавирустэй тэмцэх ажлын алба”-наас хилийн боомтын халдвар хамгааллыг чангатгах шийдвэр хэмээн танилцуулсан энэ шийдвэр нь манай улсын эдийн засагт том цохилт өгөх мэдээлэл байв. Энэ даваа гараг (2021.11.28)-ын 14.00 цагаас эхлэн Эрээн хотын төмөр замын боомтоор хүний гараар савлаж боосон бүх төрлийн барааг нэвтрүүлэхийг хориглож байгаа юм. Уг албан бичгийг сийрүүлбэл,

-Арваннэгдүгээр сарын 28-ны 14.00 цагаас эхлэн Эрээн хотын төмөр замын боомтоор зориулалтын сав, баглаа боодолгүй нүүрс, алт, зэсийн хүдэр, нефть, төмрийн хүдэр, цайрын хүдэр, химийн бордоо, хувцас.../хүний гараар сав баглаа боодлыг хийдэг бүх бараа бүтээгдэхүүн/ оруулахыг зогсоолоо.

-Арваннэгдүгээр сарын 28-ны 14.00 цагаас өмнө хилээр орж ирсэн дээр дурдсан бараа бүтээгдэхүүнийг түр хугацаагаар задлахыг зогсоож, хэрхэн шийдвэрлэхийг тухайн үед мэдэгдэнэ гэсэн байв.

Энэ шийдвэр гарснаар манай улс нурмаг ачаагаа төмөр замаар экспортолж чадахгүйд хүрч байна. Төмөр замын экспорт зөвхөн контэйнэрт л нээлттэй үлдэж байгаа юм. Энэ шийдвэр хэр удаан үргэлжлэхээс шалтгаалан Монголын эдийн засгийн тэсэх цагийн тоолуур гүйж эхэллээ.

О.Балдан-Очир