Эдийн засгийн байнгын хорооны хуралдаан болж байна. Хуралдаанаар “Эрүүл мэндээ хамгаалж, эдийн засгаа сэргээх арван их наяадын цогц төлөвлөгөө”-ний хэрэгжилтийг хэлэлцэж байна. Энэ үеэр УИХ-ын гишүүн Б.Энхбаяр гурван асуудлыг хөндөж, асуулт асуулаа. Тэрбээр “Цар тахлын үед амаргүй хоёр жилийн хугацаа өнгөрлөө. Энэ хугацааг амжилттай давж байгаа туршлагын талаар Дэлхийн эдийн засгийн форумын гүйцэтгэх захирал хэлэхдээ Засгийн газар төв банктай хамтарч байж амжилттай давах тухай бодлого дэвшүүлсэн. Харин энэ нь тодорхой хугацаатай байх ёстойг хатуу анхааруулсан. Өөрөөр хэлбэл засгийн газар, төв банк хэзээ ч дурлахгүйгээр үнсэлцэж болохгүй, нэг хөнжилд орж болохгүй. Энэ хоёрын үерхэл удаан хугацаанд үргэлжилбэл цус ойртож баларна гэдгийг хатуу сануулсан. Засгийн газар болон Монгол банкнаас асуумаар байна. Та бүхэн энэ ажил дээр ямар бодол саналтай байгаа вэ. Ипотекийн зээлийн санхүүжилтийг үргэлжлүүлэх, сунгах асуудал дээр миний санаж байгаагаар Монгол банкны ерөнхийлөгч, Сангийн сайдын яриа зөрсөн. Үнэхээр зөрөөд байна уу. Хоёрдугаарт манай улс үнэхээр гурван боомтоос хамааралтай, гурван түүхий эдээс хамааралтай эдийн засагтай юм. Чоно борооноор гэгчээр хэдэн нөхдүүд өвчин зовлонгоор далимдуулж дураараа дургиж байна. Үүнд Төмөр замын асуудал байгаа юм. Замын-Үүд Эрээний хилээр өдөрт 14 вагон гардгаас найм нь транзит, дөрөв нь төмрийн хүдэр гаргаж байна. Тиймээс жижиг дунд үйлдвэр, аж ахуйн нэгж эрхэлж байгаа хүмүүс бараагаа оруулж ирж чадахгүй. Авилга зах замбараагаа алдаж байгаа тухай дэлсээд байгаа. Төмөр замынханд цар тахлын үеийн авилгаас 10 дахин их авилга өгдөг болсон гээд байгаа. Аль их авилга өгсөн нь вагон явуулж чаддаг. Энэ асуудал дээр Төмөр замын асуудал эрхэлсэн ажил хариуцсан хүнээс Төмөр зам энэ тал дээр ямар бодлого барьж ажиллаж байна. Нээлттэй ил тод ажиллаж чадаж байна уу. Авилгын нүхийг хэр сайн хааж байна гэж асуумаар байна. Танилцуулгын 3.8-д Цар тахлын үед нийтдээ 1059 тоглолт, контент бэлтгэсэн гэнэ. “Карентин-14”, “Ковидгүй зун”, “Мэдээллийн урсгал” гээд. Үүнийг улсын төвсөөс хийгээгүй гэж тухайн үед хэлж байсан. Гэвч үүнийг улсын төсвөөс хийсэн болж таарч байна уу. Улсын төсвөөс хэдэн төгрөгөөр хийсэн бэ. Үүнд тодорхой хариулт авмаар байна гэв.
Б.Энхбаяр гишүүний асуултад хариулт болгож дараах хариултыг өглөө.
УИХ-ын гишүүн Ж.Бат-Эрдэнэ: нь Замын-Үүд чиглэлийн төмөр зам дагуу гурван сая гаруй тонн нүүрс өртөөгөөр овоолсон
“Төмөр замаар өмнө нь 14 галт тэрэг гаргадаг байсан. Одоо долоон галт тэрэг гарч байгаа. Асуудал үүсээд хэл ам гараад байсан нь Замын-Үүд чиглэлийн төмөр зам дагуу гурван сая гаруй тонн нүүрс өртөөгөөр овоолсон. Тэндээс гарах гарц нь бага учир асуудал үүсэж байсан. Гэхдээ үүн дээр Улаанбаатар төмөр зам гэхээс илүү хувийн хэвшлийн галт тэргийг татах ажиллагаа зохион байгуулагдсан. Тиймээс төмөр замын үйл ажиллагаанд хууль хяналтын үйл ажиллагаа яваад шалгагдаж байна. Одоогоор авилга авсан, тэгж шийтгэгдсэн гэсэн тодорхой мэдээлэл алга. Зарим хүн шалгагдаж байгаа нь үнэн. Улаанбаатар төмөр замын хувьд сар болгоны төлөвлөгөө гаргаж ажилладаг, энэ төлөвлөгөөний дагуу ажиллаж байгаа” гэлээ.
Сангийн дэд сайд С.Мөнгөнчимэг: Соёлын яамнаас хийсэн сошиал контенттэй холбоотой төсвөөс ямар нэг нэмэлт зардал гараагүй
Соёлын яамнаас хийсэн сошиал контенттэй холбоотой төсвөөс ямар нэг нэмэлт зардал гараагүй. Харин соёлын сайд багц үйл ажиллагааны хүрээнд ямар зохицуулалт хийснийг Соёлын яамнаас хариулах байх. Ипотекийн зээлийг сунгах тухайд цар тахлын хууль зургаан сараар хойшлогдсон учраас хойшилсон. Зээлийн тухайд Монгол банк, Барилгын хот байгуулалтын яам хамтарч хэрэгжүүлдэг. Харин Сангийн яам татвар төлөгчдийн мөнгөөр ипотекийн зээлийг өөр дээрээ авч явахад хүндрэлтэй гэсэн байр суурьтай байгаа.
Т.Мөнхжаргал
