Парламентад суудалтай гурван нам болон улс төрийн бусад 21 намын төлөөлөл өчигдөр Үндсэн хуульд нэмэлт өөрчлөлт оруулах “Тунхаг бичиг”-т гарын үсэг зурсан.
Сүүлийн зургаан сарын турш судлан ярилцан хэлэлцүүлэг хийсний үндсэн дээр улс төрийн намууд Үндсэн хуулийн өөрчлөлтийг ямар хүрээнд хийж болох талаар зөвшилцөлд хүрсэн гэсэн үг. Үндсэн хуульд өөрчлөлт оруулахдаа ямар хүрээнд хийж болох тухай намуудын зөвшилцлийг хүргэе.
МОНГОЛ УЛСЫН ҮНДСЭН ХУУЛЬД ОРУУЛАХ
НЭМЭЛТ, ӨӨРЧЛӨЛТИЙН ХАМРАХ ХҮРЭЭ
НЭГ. ХҮНИЙ ЭРХИЙГ ҮНДСЭН ХУУЛИАР БҮРЭН ХАМГААЛАХ
- Хүний нэр төр халдашгүй байна. Төрийн бүх байгууллага иргэнийхээ нэр төрийг хүндэтгэн хамгаалах үүрэг хүлээх
- Хүний амьд явах эрхийн баталгааг хангаж, цаазын ялыг бүрэн халах
- Иргэний улс төрийн эрхэд тавьсан хязгаарлалтыг арилгаж, тэгш БОЛОМЖ ОЛГОX
- Иргэн үндсэн эрхээ Үндсэн хуулийн цэцээр хамгаалуулах
- Үндсэн хуулийн цэц нь улс төрөөс хараат бус, Үндсэн хуулийн шүүх байх
ХОЁР. АРД ТҮМНИЙГ ТӨЛӨӨЛӨХ ПАРЛАМЕНТЫН ЧАДАВХ, ХАРИУЦЛАГЫГ НЭМЭГДҮҮЛЭХ
- Сонгогчдын санал гээгддэг байдлыг арилгаж, сонгуулийн холимог систем бухий хариуцлагатай, сонгодог парламентын тогтолцоог төлөвшүүлэх замаар олон намын оролцоотой зөвшилцлийн ардчилалд шилжих
- Хурдтай өөрчлөгдөж буй олон улсын шинэ нөхцөл байдалд Монгол Улсын тусгаар тогтнол, үндэсний аюулгүй байдлын баталгаа болсон парламентынзасаглалын тогтолцоог бэхжүүлэх
- Ард түмнийг төлөөлөх парламентын чадавхыг сайжруулах зорилгоор сонгогчдыг төлөөлөх мандатын тоог нэмж, Улсын Их Хурлын нэг гишүүний нөлөөллийн эрх мэдлийг багасгах
- Хууль тогтоох болон Гүйцэтгэх эрх мэдлийн хяналт тэнцэл, уялдаа холбоог зохистой болгох
- Төрийн институтуудийн эрх, үүргийг тодорхой болгон, тогтолцооны хоёрдмол байдлыг арилгаж, олон улсын жишигт нийцсэн сонгодог парламентын засаглалыг төгөлдөржүүлэх
ГУРАВ. ХОТ, ХӨДӨӨГИЙН ХӨГЖЛИЙГ ДЭМЖИХ, НУТГИЙН УДИРДЛАГЫН ТОГТОЛЦООГ САЙЖРУУЛАХ
- Төвлөрлийг сааруулах, хот, хөдөөгийн ялгааг багасгах, хөгжлийн нэг төвтэй улсаас олон төвтэй улс болох зорилгоор нийслэлийн эрх зүйн байдлыг оновчтой болгож бусад хотын хөгжлийг дэмжих
- Нутгийн өөрөө удирдах байгууллагын шийдвэр Үндсэн хууль зөрчсөн эсэхийг Үндсэн хуулийн цэц хянах
ДӨРӨВ. МОНГОЛ УЛСЫН ТӨРИЙН СҮЛДИЙГ ШИНЭЧЛЭХ
- Терийн сүлдийг төрт ёс, түүхэн уламжлалд суурилж шинэчлэх;
Энэхүү өөрчлөлтийн үр дүнд өнгөрсөн он жилүүдийн алдааг засаж, ололтоо бэхжүүлэн Монгол Улсын тусгаар тогтнол, эв нэгдэл, аюулгүй байдал улам бур баталгаажиж, ардчилсан төрийн дархлаа сайжирч, хүний эрх хамгаалагдсан, ард тумний засаглалд суурилсан, хөгжлийн шинэ боломжийг бий болгосон, хегжил дэвшил хүн бүрд хүртээмжтэй сонгодог парламентын тогтолцоотой улс болно.
Сэтгэгдэл (4)