Өнөөдрийн Засгийн газрын хуралдаанаас гарсан шийдвэрийг танилцуулж байна. Боловсрол, шинжлэх ухааны сайд, Цахим хөгжлийн яамны сайдын үүрэг гүйцэтгэгч Л.Энх-Амгалан дараах шийдвэрийг танилцууллаа. 

Нэгдүгээрт, Уул уурхайн яамтай хамтран хэрэгжүүлж буй ашигт малтмалын тусгай зөвшөөрлийн олголтыг нээлттэй болгох эсэх асуудлаар хэлэлцлээ. Өнгөрсөн хугацаанд 13 мянга орчим лиценз олгосон. Ингэхдээ хэн, ямар зориулалтаар авсан нь тодорхойгүй “лицензийн наймааны тогтолцоо” үүссэн. Уул уурхайн салбар бол эдийн засгийг бүрдүүлж байгаа томоохон салбар. Тиймээс лицензийн наймааны асуудлыг зогсоох гол шийдэл нь лиценз олголтыг хүнд суртал, авлигагүйгээр цахимд суурилсан нээлттэй болгох юм.

Цахим хөгжлийн яам, Уул уурхай, хүнд үйлдвэрийн яам хамтарч лиценз авах үйлчилгээг цахимжуулах, энэ онд багтааж e-mongolia платформд нэгтгэхээр боллоо. Ингэснээр уул уурхайн салбарын далд наймаанд цэг тавьж, олборлолт, хайгуул, ашиглалтын лицензийг нээлттэй болгоно.

Хоёрдугаарт, Зам тээврийн яамтай хамтарч Монгол Улсад байгаа замын төлбөр авах цэгийг цахимжуулах ажлыг эхлүүлнэ. Өнөөдрийн байдлаар 35 төлбөр хураах цэг байдаг бөгөөд цахимжаагүй учир орлого тодорхойгүй байдаг. Мөн гар аргаар буюу “галын хайчаар” мөнгө хураадаг. Жил бүр замын төлбөрөөс 30 орчим тэрбум төгрөг орлого болдог.

Хэрэв бүрэн цахимжуулж чадвал одоогийн энэ орлого 30 хувь буюу есөн тэрбум төгрөгөөр нэмэгдэх боломжтой. Цахимжуулахдаа, иргэдэд хүртээмжтэй байдлаар QR код уншуулах, эсвэл картаар төлбөр хийх зохион байгуулалтыг төлөвлөж байна. Ингэхдээ улсын төсвөөс нэг төгрөг ч гаргахгүй, хувийн хэвшлийн түншлэлээр хийнэ.

Одоогийн байдлаар УБЕГ 252 мянган иргэнд тоон гарын үсэг олгоод байна.Цахим үндэстэн болох бодлогод тоон гарын үсэг чухал ач холбогдолтой. Иргэд тоон гарын үсэгтэй болсноор төр болон хувийн хэвшлийн үйлчилгээг цахимаар авах боломжтой. Жишээлбэл, зээл авах тохиолдолд өөрийн биеэр очихгүйгээр тоон гарын үсэг ашиглаж зээлийн гэрээ хийх боломжтой болж байгаа юм. Ингэснээр цаашдаа нотариат шаардлагагүй болох нөхцөл бүрдэнэ.

Гуравдугаарт, ирэх хичээлийн жилд нийслэлийн хүртээмжийг нэмэгдүүлэх үүднээс 92 барилгыг цэцэрлэгийн зориулалтаар түрээсэлж 9850 хүүхдийг хамруулахаар болсон. Үүний хүрээнд сугалааны цэцэрлэгийн тогтолцоог халж байна. Жил бүр 34 мянган хүүхэд цэцэрлэгийн гадна үлддэг байсан бол шинэ хичээлийн жилээс эхлэн бүх хүүхэд цэцэрлэгт хамрагдах боломж бүрдэж байна. Есдүгээр сарын 1-нээс өмнө 26643 хүүхэд цэцэрлэгт хамрах боломжтой бол арванхоёрдугаар сарын 31-нээс өмнө үлдсэн 8000 орчим хүүхдийг цэцэрлэгт бүрэн хамруулна.

Хувийн цэцэрлэгийн хувьсах зардлыг хоёр дахин нэмэгдүүлж, хоолны зардлыг төрөөс өгөхөөр шийдвэрлэсэн. Ингэснээр хувийн цэцэрлэгт нэмж 10272 хүүхдийг хамруулах боломж нээгдэв. Төрийн өмчийн 39 цэцэрлэг дээр нэмж 4000 орчим хүүхэд, алслагдсан гэр хороололд 240 хүүхдийг гэр цэцэрлэгт, хүүхэд харах үйлчилгээгээр 2000 хүүхэд, байгууллагын цэцэрлэгээр 1000 орчим хүүхэд хамруулна" гэв. 

Т.Мөнхжаргал