Монгол Улс болон АНУ-ын агаарын харилцаа буюу хоёр улсын хооронд шууд нислэгийг нээх тухай асуудлаар Монгол Улсаас Америкийн Нэгдсэн Улсад суугаа Онц бөгөөд Бүрэн Эрхт Элчин сайд Ө.Батбаяраас тодрууллаа.

Тэрбээр "Монгол Улс, АНУ хоёрын хооронд дипломат харилцаа тогтоосны 35 жилийн ой энэ жил тохиож байгаа. Ойн хүрээнд нэг удаа арга хэмжээ зохион байгуулаад өнгөрөх биш олон арга хэмжээ төлөвлөөд хийж байгаа юм. Хоёр хөршөөс гадна гуравдагч хөрш чухал. Тиймээс хөрш орнуудын хооронд олон салбарууд дээр хамтарч ажиллаж байна. Гэсэн ч эдийн засгийн хамтын ажиллагааг түлхүү явуулах ёстой. Нэг ёсондоо АНУ-ын болон, АНУ-ын хөрөнгө оруулалттай бизнесменүүдийн ашиг сонирхлыг хэд хэдэн салбар дээр оруулах боломж бий. Тухайлбал, эрчим хүч, сэргээгдэх эрчим хүч, мэдээллийн аюулгүй байдал, уул уурхайн бүтээгдэхүүнүүдийг хөгжүүлэх боломжтой.

АНУ бол технологи болон бусад олон зүйлүүдээрээ тэргүүлдэг орон. Тиймээс энэхүү технологи, хөрөнгө оруулалтыг манай улсад оруулах нь нэн тэргүүний зорилт юм. Мөн хоёр орны соёлын харилцаанд хамтран ажиллаж байна.

Элчин сайд болсны дараа анхаарч ажиллаж буй зүйл бол АНУ руу шууд нислэгийг нээх тухай. Юуны өмнө агаарын харилцааны гэрээ хийх хэрэгтэй. Гэрээний дагуу олон шаардлагыг биелүүлэх ёстой. Тэгэхээр нэн тэргүүнд нээлттэй агаарын хэлэлцээр хийх ёстой. Долоодугаар сараас яригдаж эхэлсэн. Миний үзэж буйгаар энэ ондоо агаарын хэлэлцээр хийчих болов уу гэж бодож байна.

Хоёр орны харилцаа нээгдээд ирэхээр бараа эргэлт, зорчигч нэмэгдэнэ. Өөрөөр хэлбэл, дахин нэг гарц нэмэгдэж байна. Мөн бизнесийн хөрөнгө оруулалтын банкнуудтай уулзалтууд хийгдсэн. DFC корпорацын манай улсыг хариуцдаг хүмүүс есдүгээр сард ирж тодорхой хэмжээний яриа хэлэлцээр хийнэ. Манай улс жилдээ 250 орчим сая долларын худалдааны эргэлттэй. Үүнээс 245 орчим сая нь импорт, 10 орчим сая нь экспорт. Тиймээс хоёр орны худалдааны эргэлтийг нэмэгдүүлэхийн тулд хоёр улсын хооронд гарц үүсгэх хэрэгтэй.

Хоёр орны хооронд улс төрийн зөвлөлт уулзалтыг наймдугаар сарын 24-ны өдөр биечлэн хийж дуусгалаа.

2020 онд онлайнаар хийж байсан. Мөн есдүгээр сарын эхээр хөрөнгө оруулалтын зөвлөлдөх уулзалт хийнэ. Энэ зөвлөлт уулзалтуудаар олон зүйлийг шийдэж, олон зүйлүүдийг хэрэгжүүлэх байх. Мөн энэ улс төрийн зөвлөлдөх уулзалтаар стратегийн яриа хэлэлцээрийг хийсэн. Эндээс үргэлжлүүлээд эдийн засгийн, худалдаа, хөрөнгө оруулалтын уулзалтуудыг хийгээд явна” гэв.

Д.Батчулуун