Энэ сарын 15-ны өдөр дэлхий нийт найман тэрбум дахь иргэнээ өлгийдөн авсан билээ. Мөн тус өдөр Австралийн нийслэл Канберра хотноо дэлхийн найман тэрбум дахь иргэнтэй үе чацуу, Монгол хүү Мэргэн мэндэлсэн юм. Тэгвэл бид алс холын Австрали улсад суугаа түүний аав Б.Анандаас яриа авч, сэтгэгдлийг нь сонслоо.
-Хүүдээ Мэргэн гэх нэр өгөх болсны шалтгаан нь юу вэ?
-Мэргэн гэдэг нэрийг эхнэр бид хоёр хүүг төрөхөөс өмнө ярилцаж байсан юм. Аливаа зүйлд ухаанаар ханддаг, амьдралдаа мэргэн сонголт хийдэг хүн болон өсөж торниосой гээд бэлгэшээж өгсөн дөө.
-Та Австрали улсад юу хийж амьдардаг вэ?
-Би энд суралцаж байгаа. Австралийн Засгийн газрын тэтгэлгээр Австралийн үндэсний их сургуульд суралцахаар ирээд удаагүй байна.
-Энэхүү баярт мэдээг сонсох үеийн дурсамжаасаа хуваалцахгүй юу?
-Манай эхнэр энэ сарын 14-нд өвдөж, бид хоёр эмнэлэг явсан юм. Нийт 12 цагийн турш өвдсөний дараа 15-ны шөнө 12:52 цагт хүү минь төрсөн. Өглөө нь эмнэлгийн эмч орж ирээд нийслэл хотод нь найман тэрбум дахь хүүхэдтэй ойролцоо төрсөн ганц хүүхэд нь манай хүү гэдгийг дуулгасан. Тэгээд хэвлэлээс ирж яриа авсан нь хүмүүст хүрсэн байх. Бидний хүү үе чацуу хүүхдүүдийн хамтаар дэлхийн хүн амыг 8 тэрбум болгож байгаад маш их баярласан даа.
-Таны хүү найман тэрбум дахь хүүхэд гэж бүртгэгдэх боломж байгаа болов?
-Байхгүй гэж бодож байна. Учир нь энэ өдөр улс бүрд л маш олон хүүхэд төрж байгаа учир аль хүүхдийг яг 8 тэрбум дах гэж хэлэх боломжгүй юм байна лээ.
-Баярт мэдээг сонсох үеийн сэтгэгдлээсээ хуваалцахгүй юу?
-Хүүгээ төрнө гээд догдолж байсан. Дээрээс нь найман тэрбум дахь хүүхэдтэй ойр төрсөн гэдгийг сонсоод бүүр их баярласан. Мэдээж аав болж байгаа хүн болгон л энэ мэдрэмжийг авдаг байх. Гэхдээ миний арай илүү болов уу.
-Мэргэн хүүгийн тухай мэдээлэл хаа саагүй тархжээ. Энэ талаар?
-Маш олон хүн надад баяр хүргэж байгаа. Фейсбүүк хаяг руу маань маш олон хүний tag хийсэн мэдэгдлүүд ирсэн.
-Хүмүүс таныг анхдагчийн өлгий Булган аймгийнх гэх юм. Энэ үнэн үү?
-Үнэн. Би Булган аймгийн Хишиг-Өндөр суманд өсөж, торнисон.
-Таны эхнэрийн хувьд?
-Эхнэрийг маань Эрдэнэцогтын Лхагвасүрэн гэдэг. Завхан аймгийн Улиастай хотод төрөөд Эрдэнэт хотод өссөн.
-Манай сайтын уншигчдад хандан юу гэж хэлмээр байна вэ?
-Нийт Монголчууддаа аз жаргал хүсье. Монголд ч мөн энэ өдөр төрсөн олон хүүхэд байгаа учир манай гэр бүлийн зүгээс нийт хүүхдүүддээ бүгдэд нь баяр хүргэе.
-Эхнэртэй хандаж юу гэж хэлэх вэ?
-Мэдээж энэ бүхний ард эхнэр минь л байлаа шүү дээ. Үнэхээр их хайртай шүү гэж хэлмээр байна.
Л.Сайнаа
Сэтгэгдэл (1)