Торгоны зам дагуух улс орнуудын түүх, соёлын баялаг өвийг судлах зорилгоор 1988 онд энэ хөтөлбөрийг бий болгосон. 35 жил өнгөрчээ. Ойн хүрээнд “Торгоны замууд, олон талт байдал, хэлэлцээ, ба энх тайван” сэдэвт олон улсын форум, “Торгоны замын залуу судлаачдын тэтгэлэг” шинжлэх ухааны симпозиум, “Торгоны зам залуусын нүдээр” фото зургийн үзэсгэлэн зохион байгуулсан байна. Бас болоогүй Торгоны замуудын шинжлэх ухааны солилцоо, мэдлэгийн талаарх баримтат киног бүтээжээ.
Тус арга хэмжээнд манай улсыг төлөөлөн оролцогчид Нүүдэлчдийн түүхийг судлах, дэлхий нийтэд таниулах урт хугацааны цогц хөтөлбөрийг боловсруулж хэрэгжүүлэх тухай танилцуулж, ЮНЕСКО болон гишүүн орнуудыг хамтран ажиллахыг хүсэв.
Дашрамд дурдахад манай улс ЮНЕСКО-ийн Торгоны зам хөтөлбөрийг хэрэгжүүлэхэд ач холбогдол өгч 1992 онд Торгоны замын судалгааны олон улсын экспедицийн багийг хүлээн авч байсан юм. 1998 онд ЮНЕСКО-ийн 2-р зэрэглэлийн хүрээлэн болох Нүүдлийн соёл иргэншлийг судлах олон улсын хүрээлэнг Улаанбаатар хотноо байгуулж, улмаар 2018 онд Торгоны зам дагуух орнуудын интерактив атлас бий болгох судалгааны олон улсын хурлыг Торгоны зам дагуух орнуудын хоол хүнс, гастрономи сэдвээр Хархорин хотноо зохион байгуулсан билээ.
