Хууль зүйн дэд сайд Э.Эрдэнэжамъяан Интерпол руу захиа бичсэнийхээ төлөө АТГ-т эрүүгийн хэрэг үүсгүүлэн шалгагдаж байгаа. Учир нь түүнийг албан тушаал, эрх мэдлээ ашиглан, мөрдөн байцаалтын ажиллагаанд саад учруулсан хэрэгт сэжигтнээр тооцон шалгаж байгаа юм.
    Хууль зүйн дэд сайд Э.Эрдэнэжамъяан Интерпол руу захиа бичсэнийхээ төлөө АТГ-т эрүүгийн хэрэг үүсгүүлэн шалгагдаж байгаа. Учир нь түүнийг албан тушаал, эрх мэдлээ ашиглан, мөрдөн байцаалтын ажиллагаанд саад учруулсан хэрэгт сэжигтнээр тооцон шалгаж байгаа юм.
   
    Гэтэл МАХН-МҮАН-ын “Шударга ёс” эвслийнхэн нэгэн хачирхалтай шийдвэр гаргажээ. Энэ талаар УИХ-ын гишүүн О.Баасанхүү хэд хоногийн өмнө өгсөн ярилцлагадаа “Ямар ч гэсэн МАХН-ын харьяалалтай улс төрийн албан тушаалтнууд Интерполд захиа явуулна шүү гэсэн шийдвэрийг МАХН, “Шударга ёс” эвслээс гаргасан байгаа. Дараа нь УИХ-ын дэд дарга Л.Цог, Засгийн газрын Шадар сайд Д.Тэрбишдагва, Байнгын хорооны дарга З.Баянсэлэнгэ, миний бие ч тийм захиа явуулах байх” гэжээ.

    Тэгэхээр МАХН-аас Засгийн газарт байгаа бүх албан тушаалтнууд Интерполд захиа явуулах нь. Яг Э.Эрдэнэжамъяан шиг. Энэ нь УИХ-ын дэд дарга Л.Цогоор эхлээд, Шадар сайд Д.Тэрбишдагва, Байнгын хорооны дарга З.Баянсэлэнгэ, Сангийн сайд Ч.Улаан, Байгаль орчин ногоон хөгжлийн яамны дэд сайд Б.Тулга гэхчилэн үргэлжлэх нь.

    Юутай ч тэдний энэ шийдвэрээс Хууль зүйн дэд сайд Э.Эрдэнэжамъяан Интерполд дур мэдэн захиа явуулаагүй, нам дотроо ярилцаж байж шийдсэн нь харагдаж байгаа юм. Мөн ийнхүү ээлж дараалан Интерполд захиа бичиж байгаа нь Засгийн газрыг тогтворгүй байдалд оруулж мэдэхээр байна. Гэвч МАХН-аас Засгийн газарт орсон гишүүд энэ бүхнийг тоолгүй Н.Энхбаярын төлөөх тэмцлээ зогсоохгүй бололтой.

    Хэрвээ тэднийг Интерпол руу ээлж дараалан захиа явуулаад ирвэл хуулийн дагуу яг Э.Эрдэнэжамъяан шиг тэднийг огцруулна, эсвэл эрүүгийн хэрэг үүсгэнэ гэж үзэх байх. Учир нь Э.Эрдэнэжамъяанг Интерполд захиа бичсэн хэмээн АТГ-аас шалгаад зогсохгүй дэд сайдын суудлаас нь огцруулахаар АН-ынхан дотроо ярилцаж байгаа юм. Уг асуудлыг Хууль зүйн сайд Х.Тэмүүжин ч дэмжсэн хэмээн эх сурвалж мэдээлээд байсан билээ.

   Харин энэ бүхнээс харвал, МАХН-ын гишүүд Хууль зүйн дэд сайдыгаа авахаар ийм шийдвэр гаргасан ч байх талтай. Юутай ч МАХН-аас Засгийн газарт байгаа албан тушаалтнууд ямар бодолтой Интерполд захиа явуулж байгаа нь тодорхойгүй ч тэдний энэ шийдвэр юунд хүргэх нь ч тодорхойгүй байгаа юм.  

    Хэргийг сануулбал, Хууль зүйн дэд сайд Э.Эрдэнэжамъяан нь Сүхбаатар дүүргийн шүүхээс дөрвөн жилийн хорих ялаар шийтгүүлсэн МАХН-ын дарга Н.Энхбаярын хэрэгт холбогдон Интерполоор эрэн сурвалжлагдаж буй Н.Энхбаярын төрсөн дүү Н.Энхтуяа, “Өргөө” зочид буудлын хувьчлалтай холбоотой Б.Хуяг нарыг интерполоор эрэн сурвалжлахаа зогсоож өгөөч гэсэн утгатай албан бичиг явуулсан юм. Уг хүсэлтийг дэд сайд гаргах ёсгүй тул Интерполын нарийн бичгийн даргын газраас энэ хэргийг лавлахаар Хууль зүйн яамд захидал илгээсэн нь түүнийг “барьж” өгсөн билээ.
    
    Мөн Б.Хуяг, Н.Энхтуяа нарыг олон улсад эрэн сурвалжлах хуульд заасан үндэслэлд таарч байгаа эсэхийг дахин судалж, хариу ирүүлэх хүсэлт тус газрын ерөнхий нарийн бичгийн даргын газраас Интерполын Монголын товчоонд ирсэн. Түүгээр зогсохгүй Б.Хуяг, Н.Энхтуяа нарын эрэн сурвалжлах ажиллагааг эргэж харахаар болсоноо ч мэдэгдсэн юм. Тиймээс Э.Эрдэнэжамъяангийн уг үйлдлийг мөрдөн байцаах ажиллагаа, сэжигтэн, яллагдагчийг эрэн сурвалжлах ажлыг удаашрахад хүргэсэн хэмээн АТГ-аас шалгаж эхлээд байгаа юм.