Төв аймгийн Баяндэлгэр сумын нутагт орших Гүн галуутайн орон нутгийн тусгай хамгаалалттай байгалийн нөөц газар нь биологийн ховор төрөл зүйлээр элбэг, аргал угалз, ус намгархаг газрын ховор шувууд болон эртний булш, бунхан, хэрэгсүүр ихтэй газар аж. Гэтэл тус газарт "Ти энд Пи" компанид  1365Х, "Занарт уул" компанид 15316Х тусгай зөвшөөрөл олгосон нь газрын тухай, тусгай хамгаалалттай газар нутгийн тухай болон ашигт малтмалын тухай хуулийг зөрчсөн байна. Түүнчлэн Баяндэлгэр сумын засаг дарга Ё.Батхуяг нь Гүн галуутайн тусгай хамгаалалттай газарт тус компанийг хайгуул хийж байгааг зогсоогоогүйгээр барахгүй компаниас 5 сая төгрөг авах, сумын засаг даргын тамгын газрын хайгуулын үйл ажиллагаанд дэмжлэг үзүүлнэ гэх мэтээр гэрээ байгуулжээ. Хайгуулын ажлыг байгаль орчныг хамгаалах төлөвлөгөө батлуулалгүй хийж дуусгасан ноцтой хэрэг гарчээ.  Тус компанийг цагдаагийн байгууллагад өгөхөөр болсон байна.