Долдугаар сараас захиралгүй байсан хөгжлийн банкныг хэн удирдах нь өнөөдөр л тодорхой боллоо. Тус албанд "Хадгаламж" банкны орлогч захирал С.Сандагдоржийг томилжээ. Тус шийдвэрийг хөгжлийн банкны төлөөлөн удирдах зөвлөлөөс гаргасан бөгөөд С.Сандагдорж хүлээн авч, шинэ ажилтайгаа танилцаад байгаа аж. Өмнө нь энэ албанд Л.Болормаа ажиллаж байсан билээ. Монгол улсын Хөгжлийн банкны тухай хуульд “Гүйцэтгэх удирдлагыг олон улсын нээлттэй сонгон шалгаруулалтын дагуу сонгож, Хувь нийлүүлэгчдийн хурлын зөвшөөрснөөр Төлөөлөн удирдах зөвлөл томилж, чөлөөлнө. Гүйцэтгэх удирдлагын 50-иас доошгүй хувь нь Монгол Улсын иргэн байна” гэсэн заалт бий. Тэгвэл энэ өдрөөс эхлэн тус заалт бүрэн эрхийн дагуу хэрэгжиж эхэллээ. Хөгжлийн банкны өдөр тутмын үйл ажиллагааг удирдах, бодлогын асуудлыг Гүйцэтгэх захиралтай зөвшилцөх, шаардлагатай тохиолдолд дангаар бие даан шийдвэр гаргах эрх бүхий тус албанд ажиллахаар болж буй С.Сандагдорж нь банк, санхүүгийн салбарт олон жил ажилласан туршлагатай нэгэн. Мөн Хөгжлийн банкны тухай хуульд нэмэлт өөрчлөлт оруулахаар хуулийг төслийг боловсруулсан бөгөөд УИХ-ын энэ оны намрын чуулганаар оруулахаар бэлтгэж байгаа аж.