Сүүлийн 11-р сард ХДХВ-ийн халдвар тээгч таван тохиолдол Халдварт өвчин судлалын үндэсний төвд бүртгэгдлээ. Энэ сарын эхний хоёр тохиолдол хоёр , тавны өдөр сайн дурын шинжилгээгээр илэрч 118 халдвар тээгч бүртгэгдсэн талаар өмнө нь мэдээлж байсан удаатай.

Тэгвэл энэ сарын зургаанд дахин нэг тохиолдол илэрчээ. ХӨСҮТ-д эл өдөр сайн дураараа шинжилгээ өгсөн үйлчлүүлэгчийн сорьцонд ХДХВ-ийн халдвар илэрч, онош батлагдсан байна. Үйлчлүүлэгч 20-24 настай, эрэгтэй хүн байна.Дараагийн тохиолдлууд нь энэ сарын есөн, 12-ны өдөр мөн сайн дураараа шинжилгээ өгсөн үйлчлүүлэгчийн сорьцонд ХДХВ-ийн халдвартай нь илэрсэн байна. Тэд 20-34 настай, эрэгтэй хүмүүс аж.

Эдгээр шинэ тохиолдлууд нь манай улсад бүртгэгдэж байгаа ХДХВ-ийн халдварын 119, 120, 121 дэх тохиолдол юм. Тэдний биеийн байдал одоогоор хэвийн, зовиур шаналгаагүй байгаа бөгөөд эмч нарын хяналтанд байгаа юм байна.