Нийслэлийн Иргэдийн Төлөөлөгчдийн хурлын Өргөдөл гомдлын хороо өнөөдөр  хуралдаж  “Орон сууц нийтийн аж ахуйн удирдах газар”-ын үйл ажиллагаатай  холбоотой өргөдөл, гомдол, хүсэлтийг хэлэлцлээ. Хурлын үеэр Орон сууц нийтийн аж ахуйн удирдах газар”-ын дарга Ч.Бямбажав “Нийслэлийн Лавлагаа мэдээллийн төвийн 1234 утас болон, Он-лайнаар өнгөрсөн сарын 03-аас, энэ сарын 13-ийг хүртлэх хугацаанд нийт 268 өргөдөл гомдол ирсэн. Үүнээс орон сууцны үйлчилгээтэй холбоотой 141, халаалттай холбоотой 68, хэрэгцээний халуун, хүйтэн устай холбоотой 14, цахилгаантай холбоотой 19 гомдол ирсэн байна. Эдгээр гомдол хүсэлтийн 194-ийг нь хугацаанд нь шийдвэрлэсэн” гэв.  

 Хуралд оролцогчид, цахилгаан түгээх сүлжээ ХХК болон Дулааны шугам сүлжээ ХХК-ийн үйл ажиллагнааны доголдлоос болж  орон сууц, нийтийн аж ахуйн компаниудад гомдол маш ихээр ирдэг.  Тиймээс эх үүсвэрийн доголдлыг арилгуулах тал дээр илүүтэй анхаарах нь чухал байна гэсэн саналуудыг хэлж байлаа. Нийслэлийн Засаг даргын Барилга хот байгуулалт, дэд бүтцийн асуудал хариуцсан орлогч Н.Гантөмөр “Дулаантай холбоотой асуудал орон сууцны конторуудын байнгийн бэрхшээл. Тиймээс орон сууцны дулаан алдагдалтыг багасгах тал дээр дорвитой ажил хийх нь зөв юм. Мөн иргэдээс ирүүлж байгаа гомдлын тал гаруй хувь нь засвар үйлчилгээтэй холбоотой асуудал байдаг юм байна.  Засвар үйлчилгээг бол бид гадны ямар нэг хүчин зүйлгүйгээр шийдвэрлэх боломжтой. Тэгэхээр иргэдэд үзүүлэх энэ үйлчилгээндээ илүү их анхаарч, сэтгэлтэй хандах хэрэгтэй, цаашид, шинээр баригдах орон сууцанд дулаан алдагдалтын стандартыг тогтоох чиглэлээр бид анхаарч ажиллана”  гэдгээ хурлын үеэр мэдэгдлээ.   Мөн СӨХ болон орон сууцны конторуудын уялдаа холбоог сайжруулах чиглэлээр ажиллах нь иргэдийн гомдлыг цаг алдалгүй шийдвэрлэхэд илүү дөхөмтэй гэв. 

 НИТХ-ын Өргөдөл гомдлын байнгийн хороо нь 7 төлөөлөгчтэй бөгөөд НИТХ-ын төлөөлөгч Ш.Одгэрэл нь тус хорооны дарга юм. Тус хороо нь иргэдээс ирүүлсэн өргөдөл гомдлын асуудлыг шуурхай шийдвэрлэх, өргөдөл гомдолд дурьдсан асуудлыг судлан үзэж, нийслэлийн төр захиргааны байгууллагаас гаргаж байгаа эрх зүйн баримт бичигт тусгах, тэдний санал бодлыг нэгтгэн хурлын байгуулалтын удирдлагад танилцуулах, шийдвэрлэх ажлыг зохион байгуулах зэрэг асуудлыг эрхлэдэг гэж Нийслэлийн хэвлэл мэдээллийн албанаас мэдээллээ.