Намрын дунд сарын билэгт сайн өдөр тохиож, хурим найр элбэг буй. Энэ завшаанд бид та бүхэнд гэрлэхэд шаардагдах зүйлсийн тухай танилцуулж байна. 

Гэрлэхийг хүсэгчид өөрийн биеэр харьяа харгалзахгүйгээр улсын бүртгэлийн хэлтэст, харин Монгол Улсын хилийн чанадад ажиллаж байгаа Дипломат төлөөлөгчийн газарт хандана. Монгол Улсын “Гэр бүлийн тухай хууль”-ийн дагуу Монгол Улсын иргэд хоорондоо болон гадаадын иргэнтэй гэр бүлээ батлуулахдаа дараах материалыг бүрдүүлнэ.

Бүрдүүлэх материал:

1. Гэрлэхийг хүсэгчдийн тус тусын өргөдөл;

2. Гэрлэхийг хүсэгчдийн иргэний үнэмлэх /Гадаад иргэн, харьяалалгүй хүн бол паспорт эсхүл түүнийг орлох баримт бичиг/;

3. Эрүүл мэндийн тодорхойлолт буюу тухайн оршин сууж буй газрын эрүүл мэндийн байгууллагын шинжилгээний бичиг, /ДОХ, сүрьеэ, сэтгэцийн өвчин гэх мэт/;

4. Өмнө гэрлэж байгаагүй болон гэрлэж байсан бол гэрлэлтээ цуцлуулсан талаарх нотлох баримт /Улсын бүртгэлийн газрын архив, төрийн үйлчилгээний цахим хуудсаас гэрлэлт бүртгэлгүй лавлагаа, гэрлэлтээ цуцлуулсан тухай шүүхийн шийдвэр эсхүл гэрлэлт цуцлалтын гэрчилгээ гэх мэт/;

5. Үйлчилгээний хураамж –2500 төгрөг тушаасан тухай баримт.

Улсын бүртгэгч, бүртгэлийн ажилтан баримт бичгийг хүлээн авснаас хойш ажлын 5 өдрийн дотор гэрлэсний бүртгэлийг хөтөлнө.

Анхаарах: Насанд хүрээгүй хүнийг эрх зүйн бүрэн чадамжтай гэж тооцсон нөхцөлд шүүхийн шийдвэрийг хавсаргана. Гэрлэлтээ бүртгүүлэхдээ: Иргэний улсын бүртгэлийн тухай хуулийн 7.6-д заасны дагуу гэрлэхийг хүсэгчид тус бүр гэрчийн хамт байлцах бөгөөд гэрчээр 18 нас хүрсэн хүнийг оролцуулна. 

- Гэр бүлийн тухай хуулийн 9 дүгээр зүйлд заасан гэрлэхэд харшлах шалтгаан байгаа бол гэрлэлтийг бүртгэхээс татгалзана.

- Холимог гэр бүл буюу гадаадын иргэнтэй гэр бүлийн хувьд 14 хоногийн өмнө материалаа бүрдүүлэн урьдчилан ирүүлэх шаардлагатай. /ИУБГ-аас бүртгэлийн дугаар авч баталгаажуулдаг болно./ 

- Гадаад улсын хууль тогтоомжийн дагуу гэрлэлтээ бүртгүүлсэн Монгол Улсын иргэн гэрлэсний бүртгэлд бүртгүүлэх бол тухайн улсын эрх бүхий байгууллагаас олгосон гэрлэснийг нотолсон баримт бичгийг хавсаргана.

- Гадаад хэл дээр байгаа баримт бичиг нь албан ёсны орчуулгын хамт иргэний улсын бүртгэлд эрхийн үнэн зөвийг нотлох баримт бичиг болно.

Жич: гадаад улсад оршин суугаа иргэн ЭСЯ-ны Консулын хэлтсээс иргэдэд гэрлэлтийн гэрчилгээ олгож, гэрлэгсдийн ХААТР–15 маягтыг УБЕГ-ын бүртгэлийн системд оруулж, хяналтын байцаагч хянаснаар гэрлэлт албан ёсоор баталгаажна.

Л.Баяр