УИХ-ын гишүүн М.Батчимэг банкны хадгаламжид төрөөс баталгаа гаргадаг бодлогыг өөрийн твиттер хуудсаар дамжуулан шүүмжилсэн байна. Тэрээр твиттертээ “Банкны хадгаламжид төр баталгаа гаргах нь буруу бөгөөд тус хуулийг УИХ нэг жилээр сунгаж болохгүй. Хувийн банкуудын эрсдлийг төр хариуцах нь зөв зарчим огтоос биш. Төрд мөнгө гэж байддаггүй. Төр баталгаа гаргана гэдэг иргэдийн татварын мөнгөөр хувийн банкинд баталгаа өгнө гэсэн үг. Энэ бол  хариуцлагагүй үйлдэл. Төр баталгаа гаргаснаар банкууд.хариуцлагагүй болж Монголын банкны салбар дархлаагүй хүнтэй адил эрсдэл даах чадваргүй болж байна. Төр баталгаа өгөөд байхаар манайхаас мөнгө хүүлэх гадны сонирхол ихэсч байна. Гадныхан хямрал үүсэхэд шууд л хадгаламж дахь мөнгөө татна. Банк дундын эрсдлийн сан байгуулах, хадгаламжийн даатгалыг хөгжүүлэх замаар иргэдийн хадгаламжийг хамгаалах ёстой. Санхүүгийн салбарыг бүхэлд нь эрсдэлд оруулж, дархлааг нь устгаж хувийн банкуудыг дэмждэг энэ дампуу бодлогоос татгалзах цаг нь болсон.  УИХ сарын өмнө хэлэлцээд татгалзсан асуудал дахиад орж ирж байна. Энэ бол УИХ хувийн банкуудын лоббид автаж байгаагийн илрэл. Би өмнө нь нэгдсэн чуулганд хэлэлцэхэд нь уриалж байж унагаасан. Энэ зөвхөн улс төрчид биш, бүх хүмүүст хамаатай. Үүний хариуцлагыг Монгол банк хүлээдэггүй. Иргэд халааснаасаа төлөөд үлддэг. “Өр, хүү, бонд, хариуцлага Эдийн засгийн аюулгүй байдал хаана байна” гэх мэтээр шүүмжлэн бичжээ.