"Амар байна уу" үзэсгэлэн худалдааг Хэнтий аймгийн Дадал сумаас жил бүр зорин ирж оролцдог ЖДҮ эрхлэгч Т.Цэдэнлхамтай ярилцлаа.

-Танд энэ өдрийн мэндийг хүргэе. Сар шинийн үзэсгэлэн худалдаанд аль аймгаас оролцож байна вэ?

-Би Хэнтий аймгийн Дадал сумынх. "Амар байна уу" сар шинийн худалдаанд оролцохоор сумаасаа зорьж ирсэн. Цагаан сарын үзэсгэлэн худалдаанд энэ жил арав дахь жилдээ оролцож байна. 

-Цагаан идээгээ өөрсдөө хийдэг үү? Үзэсгэлэн худалдаанд хэдэн нэр төрлийн бүтээгдэхүүнээр оролцож  байна вэ? 

-Тийм ээ. Цагаан идээгээ гэрээрээ уламжлалт аргаар хийдэг. Энэ жилийн тухайд нийт есөн нэр төрлийн бүтээгдэхүүнтэй ирсэн.

Тухайлбал, Сүүн ааруул гэхэд таван төрлөөр, аарцны ааруул гурав, зөөхий худалдаалж байна. 

-Хэнтий аймгийн Дадал сумыг цагаан идээ, цөцгий зэргээр нь хүмүүс их мэддэг шүү дээ. Зорьж ирэх хүмүүс их байна уу? 

-Манайх мойлтой тос, цөцгий, масло зэргээрээ алдартай. Тэр ч утгаараа худалдан авагчид их байна. Цаашид үйлдвэртэй болж ажиллахыг хичээж байна. 

-Олон жил оролцож буй хүний хувьд "Амар байна уу" үзэсгэлэн худалдааны онцлогийг юу гэж харж байна вэ?

-Нийслэлээс өрхийн жижиг бизнес эрхэлдэг бидэнд түрээсгүйгээр бүтээгдэхүүнээ борлуулах боломж олгосон нь санхүүгийн хувьд ч тэр, брэндээ сурталчилахад ч тэр маш том боломжийг олгож байна. Мөн бид өдөр тутамдаа орлогоо олж чаддаггүй. Харин үзэсгэлэн худалдаанд нэг дор бүтээгдэхүүнүүдээ худалдаалж орлого олох боломжтой байдаг. Үүнээс гадна ямар нэг гурилийн орцгүй цагаан идээ гэдгийг хэрэглэгчид маань мэддэг болсноор байнгын хэрэглэгчидтэй болсон. 

- Ярилцсанд баярлалаа.