Өмнөд Африкийн ерөнхийлөгч асан Нелсон Манделагийн биеийн байдал эрс муудаж, ярьж чадахгүй болсон талаар зарим эх сурвалж мэдээлж байсан. Тэгвэл өчигдөр тэрбээр мэс засалд орж, цөсний чулуугаа авахуулсан байна. Гэсэн ч түүний уушигны өвчин хэвээр байгаа бөгөөд биеийн байдлыг нь харгалзан уушгинд нь мэс засал хийж магадгүй гэж хэвлэлийн төлөөлөгч нь мэдэгджээ. Тийм учраас хэзээ эмнэлгээс гарах нь ч тодорхойгүй байгаа аж.

    Нелсон Мандела хамгийн сүүлд өнгөрсөн хоёрдугаар сард олон төрлийн шинжилгээ өгөх зорилгоор эмнэлэгт хэвтлээ гэж мэдээлж байсан юм. Харин дараахан нь хэвлийн хөндийн өвчнийг дарахын тулд хагалгаанд орлоо гэсэн тайлбар явч байлаа. Нелсон Мандела хамгийн сүүлд Өмнөд Африкийн улс 2012 Хөл бөмбөгийн ДАШТ-д олны өмнө үзэгдсэн юм.
 
   Тэрбээр Өмнөд Африкийн бүрэн төлөөллийн ардчилсан сонгуулиар сонгогдсон анхны ерөнхийлөгч. Өмнөд Африкийн шүүхээс түүнийг арьс өнгөөр ялгавардан гадуурхахын эсрэг хөдөлгөөнийг толгойлж байхдаа хорлон сүйтгэх ажиллагаа болон бусад гэмт хэрэг үйлдсэн гэж ял шийтгэжээ. Шүүхийн шийдвэрийн дагуу Мандела шоронд 27 жил хоригдсоны нэлээд их хугацааг Роббен арал дээрхи шоронд өнгөрүүлсэн юм. 1990 оны 2-р сарын 11-нд шоронгоос суллагдсаныхаа дараа Мандела эвлэрэл, хэлэлцээг дэмжиж, Өмнөд Африкийн олон арьстны ардчилал руу шилжих шилжилтийг удирдахад хувь нэмрээ оруулжээ.  Мандела 40 гаруй жилийн дотор 100 гаруй шагнал авснаас хамгийн нэр хүндтэй нь 1993 оны Нобелийн энхтайвны шагнал юм.