МАХН-ын дарга Н.Энхбаярыг хэлмэгдүүлж байна хэмээн Шинэчлэлийн Засгийн газарт багтсан сайд нар нь Засгийн газраас гарна гэж мэдэгдсэн. Гэхдээ ийм мэдэгдэл хийгээд олон хонож байгаа ч "эвслийн удирдах зөвлөлийн хурал дээр ярьж, эцэслэн шийднэ" гээд хойшлуулсаар байгаа. Харин саяхан МҮАН-ын удирдах зөвлөлийн гишүүд хуралдаж Д.Тэрбишдагва нарын санааг дэмжихгүй гэж тохирчээ. МҮАН-ынхан анхнаасаа буйрандаа бат үлдэж, Засгийн газраас гарахыг дэмжихгүй байсан. Тиймээс удирдах зөвлөл нь ч "Шударга ёс" эвсэл засгаас гарахгүй байх нь зүйтэй гэж шийджээ. Эрчим хүчний сайд М.Сонинпил "Засгийн газраас гарна гэдэгт хоёр нам өөр, өөрийнхөө байр суурийг илэрхийлсэн. Тийм зүйл гарахгүй л болов уу гэж бодож байна.  МҮАН-ынхан хуралдаад үүнийг хүлээж авах боломжгүй гэж үзсэн" гэжээ. Нэгэнт МҮАН-ынхан гарахгүй гэдгээ албан ёсооор хэлсэн тул МАХН-ынхан ч бас Засгийн газраас гарна гэдэг "үлгэр" болж байх шиг. "Шударга ёс" эвслийн Удирдах зөвлөлд МҮАН-ынхан олонхи, тэгээд ч МАХН-ынхан өөрсдөө хойрго хандаж байна.

     Хэрэв тэд үнэхээр зориг гаргаад гарах л байсан бол тэд Н.Энхбаярын шүүх хурлын дараа шууд гарчихаж болох л байсан. Гэтэл хойшлуулж, сунжруулсаар "эвсэлтэй зөвшилцөнө" гэсээр Засгаас гарна гэсэн шуугианыг намжааж орхиод байна. Нөгөө үхэхээрээ айлгадаг хөгшин шиг "гарна, орно" гэж айлгаж байгаа нь тэдний хэр туйлбаргүй вэ гэдгийг харуулж байх шиг. Харин одоо тэд тоглоомыг өөрсдийн талд эргүүлэх гэж оролдон "манай намыг яагаад гаргах гэж яараад байна?" гэсэн юм ярьж явах болжээ. Сангийн сайд Ч.Улааны хэлсэн үг тэд засгаас гарах дургүй байгааг илтгэнэ. "Уг нь Засгийн газраас гарах нь тэдэнд ашиггүй, харин ингэж айлгаад хонжоо олох санаатай байсан" гэж дүгнэсэн яриа саарал ордноор өрөөнөөс өрөө дамжин явж байна. Тэгээд ч Э.Батшугарыг Ц.Оюунбаатарын оронд УИХ-ын гишүүн болгоно гэвэл тэдэнд хүч хэрэгтэй, бас шантааж хэрэгтэй. Тиймээс энэ удаад МАХН-ын сайд нар Засгаас гарах нь "үлгэр" болж байх шиг. Харин Н.Энхбаярын дараагийн шатны шүүх хурлын дараа МАХН-ынхан ингэж "орно, гарна" гэж айлгахаас өөр зүйл бодож олох хэрэгтэй болох нь.