Монгол Улсын Ерөнхий сайд, Хүүхдийн төлөө Үндэсний зөвлөлийн тэргүүн Н.Учрал өнөөдөр Хүүхдийн төлөө Үндэсний зөвлөлийн ээлжит хуралдааныг нээж үг хэллээ.
Тэрбээр Монгол Улс хүүхэд, залуусын орон хэдий ч хүүхдэд ээлтэй орчин, нөхцөл хангалтгүй байгааг онцлон тэмдэглэж, хүүхдийн эрхийн зөрчил, эрүүл мэндийн асуудал, боловсрол болон хамгааллын тулгамдсан асуудлуудыг хөндөв.
Сүүлийн жилүүдэд төрөлт буурч, эх болон хүүхдийн эндэгдэл нэмэгдэж байгаа бөгөөд 2025 онд 53,716 эх амаржсан нь өмнөх оноос 3,603-аар буурсан үзүүлэлттэй байна. Мөн хүүхдийн эндэгдэл болон өсвөр насны охидын жирэмслэлт бүс нутгийн дунджаас өндөр байгааг дурдав.
Түүнчлэн "хүүхдийн эрүүл мэндийн асуудал, тухайлбал шүдний өвчлөл, харааны өөрчлөлт, жингийн илүүдэл, хөдөлгөөний дутагдал нэмэгдэж буйг онцолсон юм. Мөн өсвөр насныхны цахим орчны дарамт, үе тэнгийн дээрэлхэлт, хүүхдийн эсрэг хүчирхийлэл, зам тээврийн ослын улмаас амь нас хохирох тохиолдол нэмэгдэж байна" хэмээв.
Хуралдаанаар Хүүхдийн төлөө Үндэсний зөвлөлийн 2025–2026 оны шийдвэрүүдийн хэрэгжилт, хүүхдийн эрүүл мэнд, боловсрол, хамгааллын бодлогын үр дүнг хэлэлцэхээс гадна байгууллагын дүрэмд өөрчлөлт оруулах, Хүүхэд хамгааллын бодлогыг шинэчлэх, Хүүхдийн төлөө сангийн хөрөнгийн зарцуулалтыг оновчтой болгох асуудлыг хэлэлцэхээр төлөвлөжээ.
Ерөнхий сайд Н.Учрал хүүхдийн хөгжлийн орчныг сайжруулах бодлогын хүрээнд Сүхбаатарын талбайн баруун талд байрлах хуучин хотын захиргааны барилгыг “Хүүхэд хөгжлийн ордон” болгон тохижуулах шийдвэрийг танилцууллаа. Тус ордны засвар, тохижилтод Хүүхдийн төлөө сангаас 7 тэрбум төгрөг зарцуулахаар болсон байна.
Шинэ ордон нь хүүхдийн шинжлэх ухаан, хэл, урлаг, технологи, инновацын боловсролыг дэмжих төв болох бөгөөд өдөр тутмын үйл ажиллагааг Монголын Хүүхдийн ордны захиргаа хариуцах юм. Мөн тэрбээр үндэсний аж ахуйн нэгжүүд, баялаг бүтээгчдийг хүүхдийн хөгжлийн орчныг сайжруулах үйлсэд оролцож, сургалтын танхим, өрөөг тохижуулах, нэрэмжит болгох зэргээр дэмжлэг үзүүлэхийг уриалав.
Хуралдааны төгсгөлд тэрбээр хүүхдийг эрсдэл, хүчирхийлэл, цахим дарамт, боловсролын ялгаанаас чөлөөлөх, мөн монгол хүүхдийг эх хэл, соёлын дархлаатай өсгөх шаардлагыг онцолж, хүүхдийн төлөө бодит ажил хэрэгжүүлэх цаг болсныг тэмдэглэлээ.
