Тавантолгой бүлэг ордын ашиглагдаагүй байгаа Бортээг ордыг эдийн засгийн эргэлтэд оруулах зорилгоор олон улсын сонгон шалгаруулалт явуулсан дүнгийн талаар Монгол Улсын Тэргүүн Шадар сайд бөгөөд Эдийн засаг, хөгжлийн сайд Ж.Энхбаяр өнөөдөр (2026.06.03) сэтгүүлчдэд мэдээлэл өгөв.

“УИХ-аас өгсөн үүрэг чиглэлийн дагуу Тавантолгой бүлэг ордын Бортээг хэсгийг эдийн засгийн эргэлтэд оруулах, хөрөнгө оруулж, хамтран ажиллах сонирхолтой дотоод, гадаадын аж ахуйн нэгжүүдээс санал авах сонгон шалгаруулалтыг энэ оны хоёрдугаар сарын 13-нд олон улсад нээлттэй зарласан. Сонгон шалгаруулах үйл явц дөрвөн сарын хугацаанд өрнөсөн. Дотоод, гадаадын долоон аж ахуйн нэгж сонгон шалгаруулалтад орсноос БНХАУ-ын харьяалалтай гурван компани хамгийн өндөр буюу 510 сая ам.доллароос нэг тэрбум ам.долларын үнийн санал ирүүлсэн.

Тодруулбал, “Baowu Resourses”, “China Energy Materials & Technology Xuzhou”, “China Risun Group” /Hong Kong/ гэсэн компаниуд саналаа ирүүлж, эдгээр аж ахуйн нэгжүүдтэй эхний шатны ярилцлага хийсэн.

Засгийн газраас тавьсан 14 шалгуурын хүрээнд тендерт оролцох аж ахуйн нэгжүүд 1000 оноо авах ёстой. Хамгийн багадаа 700 оноо авах ёстой ч хэн нь ч энэ оноог авсангүй. Засгийн газраас тавьсан шаардлагыг хангаагүй тул үндэсний олборлогч “Эрдэнэс Тавантолгой” компани менежментийн зохион байгуулалтаа хийж, дотоодын туслан гүйцэтгэгч компаниудтай хамтран хөрс хуулалт, олборлолтыг эхлүүлж, нүүрсний экспорт нэмэгдүүлэх үүргийг Засгийн газраас өглөө” хэмээн Эдийн засаг, хөгжлийн сайд Ж.Энхбаяр мэдэгдлээ.