Монгол Улсын Ерөнхийлөгч Ухнаагийн Хүрэлсүх “Хүнсний хувьсгал” үндэсний хөдөлгөөний хүрээнд “Тэсо” групп, “Тэсо фүүдс парк” болон харьяа “Милко”, “Айсмарк”, “Эко кластер” компанийн сүү, сүүн бүтээгдэхүүний үйлдвэр, цэвэрлэх байгууламж, “Сүүн зайрмаг” ХХК-д ажиллалаа.

“Хүнсний хувьсгал”-д нэгдэн үйлдвэрлэлээ өргөжүүлж, олон зуун ажлын байр бий болгон, татвараа төлж байгаа “Тэсо” групп болон харьяа компаниуд, “Сүүн зайрмаг” ХХК-ийн удирдлага, хамт олонд Ерөнхийлөгч талархал илэрхийллээ.

Аж ахуйн нэгжүүд цаашид ололт амжилтаа улам бататган, иргэдээ эрүүл, аюулгүй хүнсээр бүрэн хангах, улмаар хүнс экспортлогч орон болох үйлсэд үнэтэй хувь нэмэр оруулна гэдэгт итгэлтэй байгаагаа хэллээ.

“Тэсо” групп нь 1996 онд зайрмагийн торхон аяганы тоног төхөөрөмж үйлдвэрлэлийн чиглэлээр үйл ажиллагаагаа эхэлж байсан. Өдгөө үндсэн дөрвөн чиглэлээр 30 гаруй салбар компани, 2,500 гаруй ажилтантай болжээ.

Групп “Тэсо фүүдс парк” цогцолбороо өнгөрсөн онд ашиглалтад оруулснаар үйлдвэрлэлийн хүчин чадал нь гурав дахин нэмэгдэж, нэгж бүтээгдэхүүнд ногдох эрчим хүчний хэрэглээ хоёр дахин буурсан байна.

Энэ цогцолбор 150 хүүхдийн цэцэрлэг, хоногт 1000 м3 хүртэлх хаягдал ус боловсруулах цэвэрлэх байгууламжтай юм.

“Тэсо” группын 30 жилийн туршлага, үндэсний үйлдвэрлэлийн чадавх, инновац, дэвшилтэт технологи хослуулсан бүтээгдэхүүнүүд нь улсын хэмжээнд төдийгүй дэлхийн зах зээлд гарч, өрсөлдөх чадвар, үнэ цэнийг өдрөөс өдөрт бататгаж байгааг удирдлагууд нь танилцууллаа.

“Сүүн зайрмаг” ХХК 80-120 хүнийг ажлын байраар хангаж байна

Ерөнхийлөгч У.Хүрэлсүхийн очсон “Сүүн зайрмаг” ХХК өрөм, сүүн зайрмаг, цөцгийтэй тараг, соролдоо зэрэг бүтээгдэхүүнээ улсын хэмжээнд 126 салбар, Улаанбаатар хотод 2,500 орчим дэлгүүр, сүлжээ дэлгүүрээр борлуулдаг.

Цар тахлын улмаас үйл ажиллагаа нь зогсонги байдалд орсон ч “Хүнсний хувьсгал”-ын дүнд эргэн сэргэж, өдгөө фермерүүд, сав, баглаа, боодол үйлдвэрлэгч болон бусад аж ахуйн нэгжтэй кластер хэлбэрээр ажиллаж байна.

Цаашид томоохон хөрөнгө оруулалт хийн үйлдвэрийн шинэ байртай болж,  бүрэн автомат тоног төхөөрөмжтэй болох зорилт тавьжээ.

“Хүнсний хувьсгал” үндэсний хөдөлгөөний хүрээнд сүү, сүүн бүтээгдэхүүн үйлдвэрлэгч аж ахуйн нэгжүүдэд хөнгөлөлттэй зээл олгосноор Улаанбаатар хот,  Архангай, Төв, Дорнод аймагт нийт 10 үйлдвэр, цех шинээр ашиглалтад орсон байна.

Гурван аж ахуйн нэгж үйлдвэрээ өргөтгөсөн бол найман аж ахуйн нэгж тоног төхөөрөмжөө шинэчилжээ.

Манай улс өнгөрсөн онд  61 мянган тн сүүг үйлдвэрийн аргаар боловсруулж, 156 мянган тн сүүн бүтээгдэхүүн үйлдвэрлэсэн.

Одоогоор хүн амын хэрэгцээт ундны сүүг 100, сүүн бүтээгдэхүүнээр 60 хувь хангаж, 40 хувийг нь импортоор авч байна. Өнгөрсөн жил улсын хэмжээнд 260 гаруй мянган тн шингэн сүү бэлтгэсэн нь 2024 онтой харьцуулахад 15 хувиар өсжээ.

2020 оноос сэрүүний улиралд үйлдвэр, цехэд нийлүүлсэн түүхий сүүний нэг литр тутамд 1,000 төгрөгийн урамшуулал олгож байгаа.

Ингэснээр сүүний нийлүүлэлт таван жилийн дунджаар 6.6 сая литрээр нэмэгдсэн бөгөөд энэ хэрээр  сүү, сүүн бүтээгдэхүүний үйлдвэрлэл жил бүр өсөж  байна.

Салбарын яам энэ урамшууллыг үргэлжлүүлэхийн зэрэгцээ малын үүлдэр угсааг сайжруулах зэрэг цогц ажил хийхээр төлөвлөжээ.

Улсын хэмжээнд 18 аймгийн 26 суманд хоногт 1,000 гаруй тн сүү хүлээн авч боловсруулах хүчин чадалтай 160 орчим үйлдвэр, цех, сүү хүлээн авах хөргөлттэй 86 төв ажилладаг.

Дээрх газрууд хүчин чадлынхаа 50 гаруй хувийг ашигладаг бөгөөд 2,000 гаруй хүнийг ажлын байраар хангадаг юм байна.