“Ардын нам-Ард түмэндээ” аян Сүхбаатар аймагт эхэлж, Монгол Ардын намын Удирдах зөвлөлийн гишүүн, УИХ-ын гишүүн М.Мандхайгаар ахлуулсан баг тус аймгийн Баруун-Урт суманд ажиллаж байна.

Багийн бүрэлдэхүүнд намын Бага хурлын гишүүн Х.Оюунцэцэг, намын дэргэдэх Стратеги академийн  судалгаа, эрдэм шинжилгээний секторын эрхлэгч Г.Батсайхан болон ажлын албаныхан Сүхбаатарт ажиллаж байгаа юм.

УИХ-ын гишүүн М.Мандхай Баруун-Урт сумын Монгол Ардын намын идэвхтэн сонгуультнууд, гишүүд, дэмжигчидтэй уулзаж намын дарга, Ерөнхий сайд Н.Учралын санаачлан хэрэгжүүлж буй “Эрх чөлөөний дөрвөн зам, дөрвөн чөлөөлөлт”-ийн бодлогыг бүрэн хэрэгжүүлснээр ямар үр дүнд хүрэх талаар танилцууллаа.

Мөн орон нутагт чухал эрэлт хэрэгцээтэй байгаа малын гаралтай чанартай түүхий эдийг үнэд хүргэх боломжийг олгох зорилготой анхдагч хууль болох Хөдөө аж ахуйн тухай хуулийн төслийг санаачилж эцсийн хэлэлцүүлгийг хийсэн бөгөөд парламентаар батлуулахаар идэвхтэй ажиллаж буйгаа УИХ-ын гишүүн М.Мандхай онцлов.

Уулзалтын үеэр ахмадууд тэтгэж чаддаг тэтгэврийн тухай ихэд сонирхон, ямар өөрчлөлт, үр дүн гарах боломжтой хуулийн төслийг Монгол Ардын намын дарга, Ерөнхий сайд Н.Учрал УИХ-д өргөн барьж батлуулах гэж байгааг тодруулж асууж байлаа.

Стратеги академийн  судалгаа, эрдэм шинжилгээний секторын эрхлэгч Г.Батсайхан  гишүүн төвтэй E4 стратеги болон намын дэргэдэх ахмад, эмэгтэйчүүд, залуучууд, оюутнуудын холбоо манлайллын хөтөлбөр хэрэгжүүлж буй, мөн сонирхлын бүлгүүд байгуулан намын дарга саяхан батламж гардуулсан талаарх мэдээллийг өглөө. Намын гишүүд, дэмжигчид сонирхлоороо бүлэг болж ажиллах жишгийг Баруун-Урт суманд ч хэрэгжүүлэх боломжтой юм байна.

Энэхүү арга хэмжээнд Сүхбаатар аймгийн Монгол Ардын намын хорооны дарга Д.Амарбат нарын удирдлагууд оролцож гишүүд, дэмжигчдэдээ хийж хэрэгжүүлж буй ажлынхаа талаарх мэдээллийг өгсөн юм.

УИХ-ын гишүүн М.Мандхай Сүхбаатар аймгийн Баруун-Урт суманд ажиллах үеэрээ Монгол Улсын баатар Ч.Дүгэрсүрэн гуайн охин, тус аймгийн Онгон сумын харьяат, өндөр настан Д.Дуламсүрэнд хүндэтгэл үзүүллээ.