Засгийн газрын ээлжит хуралдаанаар уул уурхайн олборлолтоос үүдэлтэй эвдэрсэн газар нутгийг нөхөн сэргээх төлөвлөгөөг баталлаа. Энэ талаар БОУАӨ-ийн сайд Ц.Сандаг-Очир мэдээлэл өглөө.
Тэрбээр: "Өнөөдрийн байдлаар улсын хэмжээнд 54 мянган га газар нутаг уул уурхайгаас, хууль бус олборлолт, зам тээвэр, барилга байгууламжаас болж эвдэрсэн гэсэн судалгаа байна. Эдгээр газрыг 2026-2030 хүртэлх хугацаанд нөхөн сэргээнэ. Мөн Ерөнхий сайдын зургаадугаар сарын 3-нд гарсан албан даалгаврын дагуу манай яам, АҮЭБЯ, Экологийн цагдаатай хамтран ажлын хэсэг Сэлэнгэ аймагт ажиллалаа. Хяналт шалгалтын үр дүнг энэ долоо хоногт Шадар сайдад танилцуулахаар бэлдэж байна. Хамтарсан ажлын хэсэг цаашид Өмнөговь, Архангай, Өвөрхангай, Төв, Дорноговь зэрэг уул уурхайн лиценз олноор олгогдсон аймагт хяналт шалгалтын ажлыг үе шаттай хийнэ. Ингэснээр эвдэрсэн газрыг нөхөн сэргээх, хариуцлагатай уул уурхайг бий болгоно. Ганц нэг хариуцлагагүй байгууллагаас болж олон улсад Монголын уул уурхай хариуцлагагүй мэт харагдуулж болохгүй. Цаана нь улсын эдийн засаг, экспортын яригдана. Алт хэчнээн өндөр үнэ хүрсэн ч уул уурхайн олборлолтод тавин хяналт шаардлагыг сулруулахгүй" хэмээв.
