БАРИМТ 1
Тэрбээр 1997 оны дөрөвдүгээр сарын 06-нд мэндэлжээ.
БАРИМТ 2
Булган аймгийн Хишиг-Өндөр сумын уугуул.
БАРИМТ 3
"Сүлд" спорт хороо, Сүүнгийн Туяа ХХК, Зорчигч Тээвэр 2 ОНӨААТҮГ, Булган дэвжээний бөх.
БАРИМТ 4
Биеийн өндөр 182 см.
БАРИМТ 5
Харин биеийн жин нь 125 кг ажээ.
БАРИМТ 6
2014 онд 17 насандаа Сумын заан цолыг хүртэж байсан.
БАРИМТ 7
2017 онд 20 насандаа Булган аймгийн баяр наадмаас Аймгийн харцага цолыг хүртэж байв.
БАРИМТ 8
Улмаар 2019 онд 22 насандаа үзүүрлэж Аймгийн заан цолыг хүртжээ.
БАРИМТ 9
Тэр бол цолоо тогтмол ахиулан баридаж байгаа цөөхөн бөхчүүдийн нэг. Тиймдээ ч 2022 оны Улсын баяр наадамд тав давж Аймгийн заан цолноос шууд Улсын начин цолонд хүрсэн байна.
БАРИМТ 10
Улсын начин болохдоо тэрбээр нэгийн даваанд Аймгийн начин Г.Пүрэвбаатарыг, хоёрын даваанд Аймгийн арслан Б.Отгонбаатарыг, гурвын даваанд Улсын начин И.Ёндонсамбууг, дөрвийн даваанд Улсын гарьд Ж.Бат-Эрдэнийг, тавын даваанд Улсын харцага Ө.Даваабаатарыг тус тус давсан. Харин зургаагийн даваанд Улсын заан Д.Анарт унасан юм.
БАРИМТ 11
Улсын начин цолтой дөрвөн жил барилдсан Б.Түвшинтөгс өнөө жилийн Улсын баяр наадмаар Улсын харцага цолны болзол хангаж, Булганыхны начин цолны зулыг задлав.
БАРИМТ 12
Өнөө жил тэр нэгийн даваанд Сумын заан Д.Бадамдоржийг, хоёрын даваанд Аймгийн начин Э.Чимэддоржийг, гурвын даваанд Аймгийн заан Т.Ариунболдыг, дөрвийн даваанд Аймгийн арслан Л.Батсайханыг, тавын даваанд Аймгийн арслан Б.Даваадалайг, зургаагийн даваанд Аймгийн арслан Ж.Жавхланг тус тус давжээ. Улмаар наадмын түрүү бөх Б.Орхонбаярт унасан юм.
БАРИМТ 13
Тэрбээр бөхийн өргөөнд нэг удаа түрүүлж байсан нь 2024 оны дөрөвдүгээр сард болсон Дундговь аймгийн Дэлгэрцогт сумын харьяат, улсын харцага Лхагвасүрэнгийн Пүрэвжавын нэрэмжит барилдаан юм.
БАРИМТ 14
Мөн тэр бөхийн өргөөнд Улсын начин цолтойгоо гурван удаа үзүүрлэж байв. Тодруулбал, 2024 онд Өмнөговь аймгийн Баян-Овоо сумын харьяат, улсын начин Дашдуламын Багахүүгийн нэрэмжит барилдаан, Нийслэл Улаанбаатар хотын 385 жилийн ойд зориулсан барилдаан, 2025 онд Дорнод аймгийн Цагаан-Овоо сумын 90 жилийн ойд зориулсан, Улсын начин Дондогийн Цогзолдоржийн нэрэмжит барилдаан юм.
БАРИМТ 15
Тэрбээр мөн наадмын өмнө болсон Нийслэлийн иргэдийн баяр - Хүрээ цам даншиг наадамд Улсын заан Д.Анартай үзүүр, түрүүнд барилдан унасан.
БАРИМТ 16
Түүнчлэн бөхийн өргөөнд гурван удаа их шөвөгт үлджээ.
БАРИМТ 17
Сумын заан цолтой болон залуу бөхчүүдийн барилдаанд 2016 онд дөрөв давсан нь хамгийн том амжилт нь юм.
БАРИМТ 18
Тэрбээр 2021 оны Бүх цэргийн баяр наадамд Аймгийн заан цолтойдоо тав давж байлаа.
БАРИМТ 19
Тэрбээр өнгөрөгч Алтан цомын төлөөх барилдаанд Нутгийн Буян Групп ХХК-ийн "Хубилай Хаан" багаас барилдаж, 19 барилдаанаас 9 давсан байна.
БАРИМТ 20
Тэрбээр Булган аймгийн Хишиг-Өндөр сумаас төрөн гарсан хоёр дахь Улсын начин цолтон болж байсан.
БАРИМТ 21
Мөн тус сумаас төрөн гарсан зургаа дахь улсын цолтон ажээ.
БАРИМТ 22
Тэрбээр төрөлх нутгаасаа төрөн гарсан анхны Улсын харцага,
БАРИМТ 23
Тэрбээр мөн Булган аймгийн Орхон сумын харцага Ж.Бороос хойш мэндэлсэн Булган аймгийн хоёр дахь Улсын харцага цолтон ажээ. Ж.Бор нь 2003 онд Улсын харцага цолыг хүртэж байв.
БАРИМТ 24
Түүнийг бөхийн хорхойтнууд даруу төлөв зангаар нь үнэлдэг. Түүнд "буруугүй Түвшинтөгс" гэдэг хочийг хүртэл өгөөд амжжээ.
