БАРИМТ 1
Тэрбээр 1996 оны тавдугаар сарын 31-нд мэндэлжээ.
БАРИМТ 2
Архангай аймгийн Хотонт сумын уугуул.
БАРИМТ 3
"Бөхбилэгт" дэвжээ, "Сүлд" спорт хороо, Хатант Интернэшнл ХХК, УСУГ-ын бөх.
БАРИМТ 4
Түүний биеийн өндөр 182 см, биеийн жин 138 кг юм.
БАРИМТ 5
Э.Мөнхжаргал нь 2015 онд Сумын начин, 2017 онд Сумын заан цолыг хүртэж байжээ.
БАРИМТ 6
Улмаар 2019 оны Дархан-Уул аймгийн баяр наадамд аймгийн өлзийт начин Э.Төгөлдөрт өвдөг шороодон үзүүрлэж "Аймгийн заан" цол хүртсэн.
БАРИМТ 7
2022 Багахангай дүүргийн баяр наадамд аймгийн арслан Б.Очирхүүгээр 7 даван түрүүлж "Аймгийн арслан" цол хүртсэн байдаг.
БАРИМТ 8
Тэрбээр 2021 онд болсон залуучуудын байгууллага үүсч хөгжсөний 100 жил, үндэсний бөхийн холбооны 30 жил, Монгол бөхийг дэлхийн дээд амжилт Гиннест бүртгүүлсний 10 жилийн ойд зориулсан "Үндэсний бөх-Үнэт өв" хүчит бөхийн барилдаанд тав давсан. Харамсалтай нь, чансаа өндөр энэхүү барилдаанд улсын цол олгоогүй билээ.
БАРИМТ 9
Уг наадамд тэр нэгийн даваанд аймгийн арслан Б.Гончигтавхайг, хоёрын даваанд улсын начин М.Эрдэнэбатыг, гурвын даваанд улсын харцага Ш.Пүрэвгарьдыг, дөрвийн даваанд улсын аварга С.Мөнхбатыг, тавын даваанд улсын начин "одоо харцага" О.Мөнх-Эрдэнийг тус тус давж, зургаагийн даваанд аймгийн хурц арслан Э.Ууганбаярт өвдөг шороодсон юм.
БАРИМТ 10
Түүний аав У.Эрдэнэхүү нь мөн цэргийн начин цолтой бөх юм.
БАРИМТ 11
Аймгийн заан цолтойдоо тэрбээр 2022 оны Цагаан сарын барилдаанд түрүүлсэн. Хоёр жил цуцлагдсан сар шинийн барилдаан 2022 онд эргэн ирж, үзэгч олныг баясгасан нь энэ. Бөх сонирхогчид дор бүрнээ л түрүү бөхийн таамаг дэвшүүлж байв. Гэвч хэн нь ч Аймгийн заан Э.Мөнхжаргалыг түрүүлнэ гэж бодоогүй биз ээ.
БАРИМТ 12
Түрүүлэхдээ тэр нэгийн даваанаас эхлэн томчуудыг “нураасан”. Тухайлбал, нэгийн даваанд улсын начин Т.Дүгэрдоржийг, хоёрын даваанд улсын заан М.Өсөхбаярыг, гурвын даваанд цэргийн арслан Л.Отгонбаатарыг, дөрвийн даваанд улсын аварга П.Бүрэнтөгсийг, тавын даваанд улсын начин Ч.Батчулууныг, зургаагийн даваанд улсын гарьд Б.Гончигдамбыг, их шөвөгт улсын гарьд М.Бадарчийг, эцэст нь улсын заан Б.Пүрэвсайханыг тус тус давжээ.
БАРИМТ 13
Тэрбээр жүдо суурьтай, ОУХМ цолтой нэгэн.
БАРИМТ 14
Үндэсний бөхөд орхоосоо өмнө жүдо бөхөөр тууштай хичээллэж, улсын аварга болоод амжсан.
БАРИМТ 15
Сар шинийн улс, аймагт түрүүлсэн түүнийг 2023, 2024 онуудын барилдаанд дахин түрүүлнэ гэж хүмүүс харж байсан ч тэр хоёр жил дараалан нэгийн даваанд унасан юм.
БАРИМТ 16
Гэвч тэр сар шинийн аймаг, цэргийн цолтны барилдаанд 2022, 2023 онд тав давсан.
БАРИМТ 17
Улмаар 2024 оны Дашчойлин хийдийн нэрэмжит, сар шинийн баярт зориулсан аймаг цэргийн цолтой бөхчүүдийн барилдаанд түрүүлж, сар шинийн хоёр шатны барилдаанд түрүүлсэн цөөхөн бөхийн нэг болжээ.
БАРИМТ 18
Сар шинийн аймаг, цэрэгт түрүүлэхдээ тэрбээр дөрвийн даваанд Цэргийн заан Б.Өлзийсайханыг, тавын даваанд Аймгийн арслан П.Хүрэлбаатарыг, зургаагийн даваанд Аймгийн арслан Д.Алтанцоожийг, долоогийн даваанд Аймгийн арслан Б.Ганбаярыг, наймын даваанд Аймгийн хурц арслан О.Наранбаатарыг тус тус хаяв.
БАРИМТ 19
Тэрбээр Сумын цолтой болон залуу бөхчүүдийн барилдаанд 2018 онд дөрөв давсан нь дээд амжилт байв.
БАРИМТ 20
Тэрбээр аймгийн цолтойдоо бөхийн өргөөнд нийт таван удаа түрүүлж, нэг удаа үзүүрлэжээ. Эдгээрийн ихэнх нь улс, аймагьт байв.
БАРИМТ 21
Харин улсын цол авснаасаа хойш түрүүлж, үзүүрлэж үзээгүй яваа юм.
БАРИМТ 22
Өнөө жилийн Улсын баяр наадмаар Архангай аймгийн Хотонт сумаас гурван бөх улсын цол хүртэж, ахиулсны нэг нь Э.Мөнхжаргал юм. Б.Шаравдорж, Б.Гончигсүрэн нар Улсын начин болсон.
БАРИМТ 23
Тэрбээр Хотонт сумаасаа төрөн гарсан 13 дахь улсын цолтон. Мөн сумынхаа хамгийн анхны Улсын харцага цолтон болж байна.
БАРИМТ 24
Түүнчлэн тэр Архангай аймгаас мэндэлж байгаа 10 дахь Улсын харцага цолтон ажээ. Түүнтэй хамт энэ жил Ө.Батсуурь Улсын харцага цолыг хүртсэн.
