АНУ-ын Калифорни мужид жил бүр зохион байгуулдаг “Дэлхийн хамгийн царай муутай нохой” шалгаруулах тэмцээний 2026 оны ялагчаар 6 настай Паг үүлдрийн Жинни Лу тодорлоо. Тэмцээн энэ жил 50 дахь удаагаа зохион байгуулагдсан байна. Жинни Лу наймдугаар сарын 14-нд Санта-Роза хотын "Sonoma County Fairgrounds"-д болсон тэмцээнд бусад нохдыг ардаа орхиж, тэргүүн байр эзэлжээ. Түүний эзэн 5000 ам.долларын шагнал хүртсэн байна. Харин хоёрдугаар байрт Пинки нэртэй Чихуахуа-Померанианы холимог, гуравдугаар байрт Отто нэртэй Чихуахуа холимог нохой шалгарчээ.
Жинни Лу нь энгийн нэгэн тэжээвэр нохой биш, аврагдсан нохой юм. Түүнийг Өмнөд Солонгосын уулнаас маш хүйтэн үед модон хайрцагт хийсэн байхад нь олж аварчээ. Дараа нь АНУ-д үрчлэгдэн, шинэ эзэнтэйгээ амьдрах болсон байна.
Сонирхолтой нь Жинни Лу энэ тэмцээнд өмнө нь ч оролцож байсан бөгөөд 2025 онд хоёрдугаар байр, мөн “Spirit Award” буюу тэсвэр хатуужил, урам зоригийн шагнал хүртэж байжээ. Энэ жил дөрөв дэх оролдлогоороо түрүүлсэн байна.
Хэдийгээр тэмцээний нэр нь “хамгийн царай муутай” боловч зохион байгуулагчид уг арга хэмжээ нь нохдыг шоолох зорилготой биш гэдгийг онцолдог. Харин гадаад төрхөөс үл хамааран бүх нохой үнэ цэнтэй бөгөөд үрчлэн авахын ач холбогдлыг сурталчлах зорилготой аж. Оролцогч нохдыг тэмцээний өмнө малын эмчийн үзлэгт заавал хамруулдаг байна.
Ийнхүү “царай муутай” хэмээх тодотголтой Жинни Лу дэлхийн хамгийн азтай нохдын нэг болж, 50 жилийн түүхтэй тэмцээний шинэ аварга боллоо.
Л.Баяр
