Нэг хэсэг манай улсын телевизийн хөтөлбөрт хүүхдийн нэвтрүүлэг байхгүй учраас багачуудын хүмүүжилд сөргөөр нөлөөлж байна гэх шүүмжлэл газар авч, асуудлыг шийдсэн билээ. Одоо телевизийн байгууллага бүр хүүхдийн нэвтрүүлэгтэй болохыг эрмэлзэж, зөвхөн хүүхдэд зориулагдсан гурван ч суваг ажиллаж байна. Хэдийгээр өмнөх байдал өөрчлөгдсөн ч гэлээ шүүмжлэлт зүйл гарч байгааг эцэг эхчүүд хэлэх болжээ.

     Нэг хэсэг манай улсын телевизийн хөтөлбөрт хүүхдийн нэвтрүүлэг байхгүй учраас багачуудын хүмүүжилд сөргөөр нөлөөлж байна гэх шүүмжлэл газар авч, асуудлыг шийдсэн билээ. Одоо телевизийн байгууллага бүр хүүхдийн нэвтрүүлэгтэй болохыг эрмэлзэж, зөвхөн хүүхдэд зориулагдсан гурван ч суваг ажиллаж байна. Хэдийгээр өмнөх байдал өөрчлөгдсөн ч гэлээ шүүмжлэлт зүйл гарч байгааг эцэг эхчүүд хэлэх болжээ.

    Юун түрүүнд хэт орой хүүхдийн нэвтрүүлэг гарч байгаа нь аав, ээжүүдэд таалагдахгүй байна. Дуртай нэвтрүүлэг, сонирхолтой хүүхэлдэйн кино гарч байхад хүүхэд үзэхийг хүснэ. Харин маргааш өглөө нь цэцэрлэгтээ, сургуульдаа явах ёстой учраас ээж нь унтуулахыг хүснэ. Ингэж үл ойлголцол эхэлдэг аж. Хүүхдэд зориулсан нэвтрүүлэгтэй телевизүүд ихэнхдээ оройн цагаар давталтыг нь гаргадаг аж. Үүнийг үзэгч хүүхдүүд өмнө нь үзсэн байлаа ч давталт гэж харгалзахгүйгээр шимтэн суудаг нь тэдний онцлог юм. Тийм ч учраас ээж, аавынхаа үгийг үл тоон, өөртөө зориулагдсан зүйлийг үзнэ гэж зөрүүдэлдэг. 12 хүртэлх насны хүүхдүүдийн сурсан бүхэн ямар хүн болохыг тодорхойлж, төлөвшүүлдэг аж. Тэгвэл эцэг эхтэйгээ орой бүр үл ойлголцож, зөрүүдэлвэл ирээдүйд ямар хүн болох нь тодорхой болно.

    Хүүхдэд зориулсан нэвтрүүлэг хэт орой гарч байгаа нь багачуудын бие, эрүүл мэндэд ч мөн нөлөөтэй. Энэ учрыг тайлбарлахын өмнө сурагч хүүгийн амьдралын хэмнэлийг аваад үзье. Өглөө 07:00 цагт босч, цайгаа уугаад хичээлдээ явна. Өдөр хичээлээ тарж гэртээ ирээд хичээлээ хийнэ. Мөн найзуудтайгаа хэсэг тоглож, орой хоолоо идээд амрах ёстой. Яг энэ үед өөрт “хаягласан” нэвтрүүлэг, хүүхэлдэйн кино гарч байвал дуустал нь үзэх болно. Төдий хэмжээгээр оройтож унтах нь тодорхой. Маргааш өглөө дахиад л эрт босч явах ёстой. Тэгвэл хүүхдийн эрүүл мэнд талаас өдрийн хэмнэлийг тодорхойлохдоо унтах цагийг дараах байдлаар тусгажээ. Цэцэрлэгийн насны хүүхэд өдөрт 11-13 цаг унтах ёстой. Харин бага ангийн хүүхдүүд өдөрт 10-11 цаг унтаж байх хэрэгтэй гэнэ. АНУ-ын эрдэмтдийн тогтоосноор 10-12 настай хүүхдүүд 8-9 цаг унтаж байж өөрт шаардлагатай эрч хүчийг нөхөж авдаг гэнэ. Унтаж нойрсох нь биеийг амраахаас гадна тархийг ч сэргээж, амраадаг тул хүүхдийн сурлага, идэвхид их нөлөөтэй байдаг аж. Өглөө долоон цагт босох ёстой гэж үзвэл хүүхдийг үдэш аль болох эрт унтуулах нь зөв байх нь.

    Телевизийн хөтөлбөр дундаас хүүхдэд зориулсан нэвтрүүлэг өөр нэгэн асуудал үүсгэдэг аж. Аав, ээж нь өглөө босгож, хувцаслаад сургуульд хүргэж өгдөг. Өдөр хичээл тарахын үед өөрөө эсвэл өвөө, эмээгээр нь авахуулдаг нь монголчуудын дунд нийтлэг. Эцэг эх нь ажлаасаа тарах хүртэл хүүхэд өөр хүнтэй өдрийг өнгөрөөнө. Гэртээ ирээд хүүхэд зурагтаа үзэж, аав ээж нь хоолоо хийж үдэштэй золгодог. Бүх ажил дуусч аав, ээж нь хүүхэдтэйгээ ярилцах, хамт байх цаг болоход хүүхэд нь нэвтрүүлэг, киногоо үзээд суучихна, эсвэл ядраад унтчихсан байх жишээтэй. Ийм байдлаар нээлттэй ярилцаж, хамт байх цагийг нь зурагт “хулгайлаад” байгаад бухимдах аав, ээж цөөнгүй.

    Хэдийгээр телевизийн нэвтрүүлэг эфирийнхээ цагийг хүүхдэд зориулдаг нь сайн боловч зөвхөн зурагтны хүмүүжилтэй иргэн болгохгүй байхыг хүсэх цаг иржээ. Нөгөө талаас хүүхдүүд телевиз үзэх цагийнхаа 70 хувийг насанд хүрэгчдэд зориулсан мэдээлэл хүлээн авч байдаг гэх мэргэжилтнүүдийн судалгаа ч гарсан. Тиймээс хүүхдийн нэвтрүүлэг дундуур гарах сурталчилгаа, хүүхдэд зориулсан нэвтрүүлэг, хүүхэлдэйн киног гаргах цаг хугацаагаа сайтар тунгаавал аав, ээж, хүүхдэд тустай юм.