Он гарсаар олны анхаарал татсан хэрэг олон гарав. Тухайн үедээ хэвлэл мэдээллээр шуугиж, нэг хэсэгтээ л олны анхаарлын төвд байсан ч хэрэг нь хэрхэн шийдэгдсэн эсэх нь тодорхойгүй байсаар замхардаг.

    Он гарсаар олны анхаарал татсан хэрэг олон гарав. Тухайн үедээ хэвлэл мэдээллээр шуугиж, нэг хэсэгтээ л олны анхаарлын төвд байсан ч хэрэг нь хэрхэн шийдэгдсэн эсэх нь тодорхойгүй байсаар замхардаг.

    Харин уг хэргүүд ямар шатандаа яваа талаарх мэдээллийг хүргэж байна.


    Он гарсаар хамгийн их дуулиан тарьсан хэрэг бол МИАТ-ын асуудал. МИАТ-ын гэх тодотголтой уг хэрэгт олон хүн холбогдож, ШШГЕГ-ын харьяа хорих 461 дүгээр ангид саатуулагдан шалгагдаж байгаа. Тодруулбал, "Монголиан Эйрлайнес" компанийн эзэн Ч.Хоролсүрэн, түүний төрсөн дүү Ч.Суурьтогтох, Н.Гантөмөр, МИАТ ХК-ийн гүйцэтгэх захирлын албан тушаалыг хашиж байсан гавьяат нисгэгч Р.Бат-Эрдэнэ, Б.Эрдэнэбилэг, Ц.Орхон болон түүний эхнэр Ү.Цэцэгмаа, Төрийн өмчийн хороонд ажиллаж байсан С.Батхишиг, МИАТ-ын захирал асан Б.Эрдэнэбилэгийн төрсөн дүү Б.Мандахбаяр нарын есөн хүнийг баривчлан цагдан хориод байгаа билээ. Мөн уг хэрэгт УИХ-ын зарим гишүүд холбоотой гэсэн ч таг чиг болсон. Түүнчлэн эх сурвалжийн мэдээлснээр уг хэрэгт холбогдогчдын хүрээ тэлсээр байгаа учир хэргийг хумих үүрэг өгсөн хэмээн мэдээлсэн юм. Харин МИАТ-ын гэх тодотголтой уг хэргийн мөрдөн байцаалтын ажиллагаа үргэлжилж байгаа аж. Сэжигтнүүд мэдүүлгээ өгч, мөрдөн байцаалтын ажиллагаа үргэлжилсээр.


    Өнгөрсөн нэгдүгээр сарын 5-8-нд шилжих шөнө Сэлэнгэ аймгийн Сүхбаатар суманд үл таних долоон залуу 24 настай эмэгтэйг гурав хоногийн турш буудал дамжуулан хүчиндсэн хэрэг гарсан. Тухайн үед хохирогч эмэгтэйн ар гэрийнхэн “Миний дүүг зүс таних залуус хүнсний дэлгүүрээс гарч явахад нь хүчээр буудалд чирч оруулсан. Улмаар ам руу нь архи цутгаж, гурав хоног хүчирхийлсэн. Тэднийг суллаж явуулахад нь дүү маань найз залуу дээрээ шууд очиж үнэнээ хэлж, бидэнд мэдэгдсэн. Бид ч тэр даруй цагдаад хандсан” хэмээн мэдэгдсэн юм. Харин хэвлэлээр эмэгтэй анх “Орхон” зочид буудалд найз залуутайгаа орж ирсэн. Харин дараа нь найз залуу нь найзуудаа дуудсан байна” хэмээн цацагдсан билээ.
Гэхдээ мөрдөн байцаалтын явцад эмэгтэй өөрөө найз залуутайгаа буудалд орж, ууж идсэн нь тогтоогдсон.
Одоогоор хэргийн мөрдөн байцаалтын ажиллагаа үргэлжилж байгаа бөгөөд цагдан хоригдсон хоёр залууг суллаагүй байгаа юм байна. Тэдэнд эрүүгийн хэрэг үүсгэн шалгаж байгаа билээ.


    Өнгөрсөн хоёрдугаар сарын 3-4-нд шилжих шөнө МоАХ-ын дарга асан Г.Бошигт өөрийн төрсөн хүү Х-г хөнөөсөн хэрэг үйлдсэн. Тэрээр хэрэг үйлдэхдээ согтууруулах ундаа хэрэглэсэн байсан билээ. Өдгөө 71 настай Г.Бошигтыг ШШГЕГ-ын харьяа цагдан хорих 461 дүгээр ангид саатуулан шалгаж байгаа юм. Мөн түүнд Эрүүгийн хуулийн тусгай ангийн 91.1-т зааснаар бусдыг санаатай хөнөөсөн гэх зүйл ангиар эрүүгийн хэрэг үүсгэсэн. Харин уг хэргийн мөрдөн байцаалтын ажиллагаа дуусч байгаа бөгөөд удахгүй прокурорын хяналтад шилжүүлэхээр болжээ. 
   

    Өнгөрсөн нэгдүгээр сарын 15-нд алга болсон Дорнод аймгийн иргэн 55 настай М.Баярцогтыг өнөөдрийг хүртэл олоогүй байна. Түүнийг алга болсноос хоёр өдрийн дараа машиныг нь Улаанчулуутын хогийн цэг дээр бүрэн шатсан байхад нь олсон билээ. Шинжээчид машиныг дэлбэрээгүй, дотроос нь зориудаар шатаасан байна гэх дүгнэлт гаргасан юм. Түүнийг ар гэрийнхэн болон Сонгинохайрхан дүүргийн цагдаагийн хэлтсийн алба хаагчид хайж байгаа боловч олдохгүй байгаа аж.


Өнгөрсөн нэгдүгээр сарын 22-23-нд шилжих шөнө Баянгол дүүргийн арванхоёрдугаар хорооны нутаг дэвсгэрт  үйл ажиллагаа явуулдаг "High class" зочид буудалд үйлчлүүлж байсан Ш гэх эмэгтэй зургаан давхрын цонхоор унаж амиа алдсан харамсалтай хэрэг гарсан. Уг хэрэгт хохирогч эмэгтэйтэй хамт явсан найз болох 35 настай Г болон БНХАУ-ын иргэн У нар түүнчлэн буудлын ресепшн зэрэг таван хүнийг шалгаж эхлээд байгаа юм. Мөн хохирогчийн найз 35 настай Г, хятад улсын иргэн У нарыг ШШГЕГ-ын харьяа цагдан хорих 461 дүгээр хорих ангид саатуулаад байгаа билээ. Хэргийн мөрдөн байцаалтын ажиллагаа үргэлжилж байгаа бөгөөд хэргийг Баянгол дүүргийн цагдаагийн нэгдүгээр хэлтэс, Улсын мөрдөн байцаах газрын онц хүнд зохион байгуулалттай гэмт хэрэгтэй тэмцэх хэлтэс хамтран шалгаж байна.