Mining.com сайт Оюутолгой төслийн байгаль орчин болон нийгэмд үзүүлэх нөлөөллийн асуудалд АНУ ямар байр суурьтай байгааг мэдээлжээ. Нийтлэлийг хураангуйлан хүргэе.

АНУ Монголын зэс алтны төслийг санхүүжүүлэх Дэлхийн банкны санал хураалтаас татгалзсаны дараа дэлхийн хоёрдугаарт бичигддэг Рио Тинто Оюутолгой төслийг хэрэгжүүлэх болсон билээ.

Өмнөговийн уул уурхайд аль хэдийнээ 6 тэрбум ам.доллар зарцуулсанаа мэдэгдсэн Рио Тинтогийн удирддаг буюу төслийг голлон хэрэгжүүлж буй "Turquoise Hill Resources" компани ирэх зургаадугаар сард борлуулалтын бүтээгдэхүүнээ үйлдвэрлэж эхэлнэ хэмээн төлөвлөж байна.

Мөн "Turquoise Hill Resources" компаний мэдэгдсэнээр Дэлхийн банкны салбар байгууллага болох Олон улсын санхүүгийн корпораци, Европийн сэргээн босголт хөгжлийн банк зэрэг газруудтай нэмэлт 4.5 тэрбум ам.долларын зээлийн гэрээ хийсэн байна. Оюутолгойн төслийг амжилттай хэрэгжүүлж, газар доорх уурхайг нээхийн тулд олон хувийн байгууллагатай ч хамтран ажиллах хэрэгтэйг  Рио Тинто онцолж байна.

"Inter Press Service" сайт баасан гарагт мэдээлснээр АНУ-ын тал энэхүү томоохон төсөл дээр Олон улсын санхүүгийн корпорацийг оруулахгүй байлгах саналаас татгалзсан ч гэлээ маргаантай төсөл дээр их хэмжээний өөрчлөлт оруулах хэрэгтэй гэсэн байр суурьтай байна гэжээ.

АНУ-ын Сангийн яам Оюутолгой төслийн "Байгаль орчин болон нийгмийн нөлөөлөх үнэлгээ" нь өргөн хүрээний зовинолыг дагуулж байна хэмээх дүгнэлт хийснээ энэ долоо хоногт албан ёсоор мэдээлсэн байна.

Нэгдүгээрт, АНУ нь байгаль орчин болон нийгмийн нөлөөллийг үнэлэх нь ялангуяа уул уурхайн төсөлтэй холбогдсон бол маш чухал асуудал гэсэн байр суурьтай байдаг. Хоёрдугаарт, Байгаль орчин болон нийгмийн нөлөөллийн үнэлгээ нь эцэст гарах үнэлгээг тодорхой харуулж чаддаггүй хэмээсэн байна. 

"Нарийвчлан хэлбэл, Оюутолгой төслийн нөлөөллийн талаарх дээрх үнэлгээ нь уурхайн үйл ажиллагаанаас илүү төслийн бүтээн байгуулалтын ажил дээр ч анхаарах ёстойг харуулж байгаа юм" хэмээн АНУ-ын Сангийн яам мэдэгджээ. Энэхүү дүгнэлт, баримт бичгийг Өмнөговийн малчдын санал бодол зэрэг бодит судалгаан дээр тулгуурлан гаргасан бөгөөд бидний үнэлгээ, дүгнэлт гаргасны үр ашиг гарах эсэх нь ихээхэн сонирхол татаж байна хэмээн Сангийн яамны төлөөлөгч мэдэгдсэн байна.