Ашигт малтмалын газрын дарга асан Д.Батхуяг нарт холбогдох хэргийн давж заалдах шатны шүүх хурал өнөөдөр болно.

Хэрвээ шүүх хэргийг хэвээр үлдээвэл түүнд Улсын дээд шүүхийн хяналтын шатны шүүхэд хандаж гомдол гаргах эрх байгаа. Тэрээр гомдол гаргахын бол Дээд шүүх хэргийг хэлэлцэнэ. Нийслэлийн шүүхээс хэргийг дутуу явагдсан гэж үзвэл Мөрдөн байцаалтад буцаах, ялыг өөрчлөх боломжтой. Хэргийг хэрэгсэхгүй болгох ч боломжтой юм. Түүнийг цаашид хэрхэх нь өнөөдрийн  шүүх хурлын шийдвэрээс хамаарна.

Д.Батхуяг нарын хэргийг өнгөрсөн нэгдүгээр сард Баянзүрх дүүргийн шүүгчид гурав хоногийн турш хэлэлцэж, Д.Батхуягт 6.6 жил, Т.Даваацогтод зургаан жил, н.Жаргалсайхан, н.Бат-Ирээдүй нарт тус тус 5.1 жилийн ял оноосон билээ.

Хэргийг сануулахад, Д.Батхуяг, Л.Даваацогт нар нь бүлэглэн 2009, 2010 онд эрх мэдэл буюу албан тушаалын байдлаа урвуулан ашиглаж, Ашигт малтмалын тухай хуулийн холбогдох заалтуудыг зөрчин, сонгон шалгаруулалтаар олгох ёстой нийт 108 ширхэг тусгай зөвшөөрлийг бусдад сонгон шалгаруулалтгүйгээр олгож, төрийн байгууллагын хуулиар хамгаалагдсан эрх ашигт хүнд хор уршиг учруулсан хэрэгт буруутгагдаж буй юм.

Мөн С.Жаргалсайхан, Ш.Бат-Ирээдүй нартай бүлэглэн "Саусгоби сэндс" ХХК-ийн эзэмшлийн ашигт малтмалын дөрвөн тусгай зөвшөөрлийг Ашигт малтмалын тухай хуульд зааснаар цуцлах тухай дүгнэлт гарсан байхад цуцлах үүргээ хэрэгжүүлэлгүй, тус компанийн ашиг сонирхлын үүднээс үүссэн нөхцөл байдлыг ашиглан хясан боогдуулах замаар тусгай зөвшөөрлийг сэргээж, С.Жаргалсайханд, "Зэлэм" ХХК-ийн эзэмшилд шилжүүлэн хээл хахууль авсан гэмт хэрэгт тус тус буруутгагдсан юм.