Филиппин улсын хууль сахиулах албаны хүсэлтээр Интерполоор манай улсын иргэн 21 настай Т.Аятунгааг эрэн сурвалжилж эхэлснээр Т.Аятунгаа хүн бүрийн анхаарлыг татаж эхэлсэн. “Түүнийг яагаад эрэн сурвалжлав “ энэ асуултын хариултыг авах гэсэн хүмүүсийн өмнө тэрээр үнэн худал нь мэдэгдэхгүй олон асуудлыг ярьсаар гарч ирж байсан.
Хамгийн анх түүнийг Филиппин улсын иргэн П.Вендо гэгчтэй хамтран нутаг нэгтнээ хүний наймааны золиос болгосон, хар тамхи тээвэрлэсэн хэрэгт холбоотой байж болзошгүй хэмээн сэжиглэн, эрэн сурвалжилж байгаа хэмээн хэвлэлээр цацагдаад байсан. Үүний дараа хүүхдийн эсрэг гэмт хэргээр эрэн сурвалжилж байгааг нь тогтоосон.

Харин энэ бүхэнд хариу хийхээр Т.Аятунгаа олны өмнө гарч ирсэн. Тэрээр “Филиппин улсад амьдарч байхдаа таван сартай Ч.Тэргэлсар охиноо алдсан. Паспортгүй болж, визний хугацаа дууссан учир Монголд түр үнэмлэхээр ирсэн. Гэхдээ буцаж очоод охиноо хайсан. Мэдээж энэ хэргийг миний хүүхдийн аав хийж байгаа байх” хэмээн мэдээлэл өгч байлаа. Харин уг мэдээллийг хийсний дараахан Гадаад харилцааны яамнаас өөр нэгэн тайлбар өгсөн. Тодруулбал, түүнийг өөрийн охинтой зүй бусаар харьцсан хэмээн Филиппиний шүүхээр шүүгдсэн гэсэн билээ.
Энэхүү мэдээллийг баталж байгаа аятай  түүний нөхөр гэх Чарльз Эдвард түүнийг "Охинтойгоо зүй бус харьцсан. Амь насанд нь аюул учруулахыг завдсан" хэмээн тус улсын хуулийн байгууллагад хандаж байсан нь дэлгэгдсэн.  Мөн түүний нөхөр  өөрийн фэйсбүүк хуудсандаа  өөрийгөө хүүхдийн асран хамгаалах албан ёсны эрхтэй гэсэн бөгөөд Т.Аятунгааг хүүхэддээ хүч хэрэглэсэн талаар дэлгэж байсан билээ. Ингээд энэ хэрэг хэнийх нь зөв, хэнийх нь үнэн болох нь нотлогдохгүй өдийг хүрсэн.  Харин Ч.Тэргэлсар охиныг болон Т.Аяатунгаагийн нөхрийг олж чадаагүй байгаа.
Уг нь  Ч.Тэргэлсар охиныг эх оронд нь буцаах, одоо хаана байгааг нь тогтоох, бусад улсын иргэншил авсан эсэхийг тодруулж өгөхийг Гадаад харилцааны яамны Консулын газрын захирал Ш.Сүхбаатар Филиппин Улсын Гадаад харилцааны яамны Консулын газрын дарга Жэйм Виктор Б.Лэддатай уулзах үеэрээ хүсч байсан.
    Энэ үед Филиппины тал нь Чарльз Эдвард Эргенийг  Филиппин улсын иргэн биш болохыг нотолж уг иргэн нь 2012 оны 12  дугаар сарын 7-ны өдөр Филиппин улсаас гарч явсан, Ч.Тэргэлсар нэртэй иргэн тус улсын хилээр орж гарсан тухай ямар нэг мэдээлэл байхгүй болохыг уулзалтын явцад шалган тодруулж өгсөн юм.

Өдгөө Гадаад харилцааны яам, Хүний эрхийн үндэсний комисс, Төрийн бус байгууллагуудад хандсан байгаа ч хүүхдийн сураг гараагүй л байна.

Манай улсын хуулинд интерполоор эрэн сурвалжлагдаж буй өөрийн улсын иргэнээ барьж өгөх гэсэн зүйл заалт байхгүй. Тиймээс Т.Аятунгаа эх орондоо тайван амгалан байгаа.

Улсын мөрдөн байцаах газрын зүгээс Т.Аятунгаагийн хүүхдийн хэрэгт эрүү үүсгэн шалгаж байгаа билээ. Ер нь энэ хэрэгт хэнийх нь зөв,  бурууг хэн ч мэдэхгүй байгаа. Үүнийг хууль хяналтынхан тогтоох л үлдээд байгаа билээ. Тэгвэл манай улсын Мөрдөн байцаах газрын зүгээс Филлипин улсад Т.Аятунгаагийн нөхрийг шалгах хүсэлтийг явуулсан. Харин Филиппин улсын зүгээс одоогоор хариу ирүүлээгүй байгаа юм. Хэрэв Чарльз Эдвардийг олвол Т.Аятунгаагийн охиныг олох магадлалтай юм.