Цагдаагийн ерөнхий газарт гэмт хэргийг сурталчилсан гэх мэдээ мэдээлэл, хаяг реклам, кино, видео гээд төрөл бүрийн зүйл л бүртгэгдээд явж байдаг. Тэр дундаа хэвлэл мэдээллийн хэрэгслээр удаа дараа гэмт хэргийг сурталчилсан мэдээ мэдээлэл гардаг. Тиймээс ЦЕГ-аас тухай бүрт нь сануулга өгдөг. Харин сануулга, санамжийг удаа дараа зөрчих юм бол хариуцлага тооцох хүртэл арга хэмжээ авдаг байна.  Тэгвэл сүүлийн үед гэмт хэрэг, садар самууныг  сурталчилсан нэр томъёо ихээр гарч ирэх болсон тухай ЦЕГ-ын хэвлэл мэдээллийн ажилтан Н.Төгсбаяр хэлж байсан юм. Гэмт хэргийг ямар нэг байдлаар сурталчилсан л бол ЦЕГ-ийн зүгээс тэр даруйд нь бүртгэж аваад тодорхой сануулгыг өгч, зөрчлийг арилгуулдаг учиртай.

Тэгвэл маш олон гэмт хэрэг сурталчилсан нэр томъёо байдгаас урлагийн зарим нэг хамтлагийн нэрний агуулга, киноны нэр зэрэг нь  Цагдаагийн газарт бүртгэгдээд явж байгаа юм байна. Үүнд, дөнгөж саяхан нээлтээ хийсэн “Дурлалын гэмт хэрэг” киноны нэр, “Extacy” хамтлагийн нэр зэрэг нь гэмт хэрэг сурталчилсан гэдгээр тэмдэглэгдсэн байна.

    “Дурлалын гэмт хэрэг” киноны нэрний хувьд гэмт хэргийг сурталчилсан утга агуулгатай ч кинондоо ямар ч гэмт хэргийг сурталчилсан зүйл байхгүй. Инээдмийн төрөл жанрын кино юм.  “Хүний дотор чөтгөр ч нуугддаг, бурхан ч бий. Хүн ямар ч гэмт үйлдэл хийсэн бай дурлалт хүнээ цайруулж чадна. Тийм учраас энэхүү киногоороо хүний  дотор байдаг олон өнцгийг харуулахыг зорьсон” кино юм. Гагцхүү нэр нь л гэмт хэрэг сурталчилсан байна. Ямартаа ч цаашдаа урлагийнхан маань ч уран бүтээлдээ аль болох гэмт хэрэг сурталчилсан зүйл гаргахгүй байх гэдэг үүднээс энэ киноны нэрний тухайд жишээ авлаа.

Харин “Extacy”  гэх нэрний тухайд олон утгатай. Тус хамтлагийн хувьд сэтгэлийн хөдлөлийн дээд цэг гэсэн утгаар хамтлагаа нэрлэсэн байна. Гэсэн ч Цагдаагийн байгууллагад нь энэ нь гэмт хэрэг сурталчилсан нэр томъёонд тооцогддог юм байна. Учир нь  “Extacy”  гэдэг  мансууруулах бодис буюу хар тамхи байдаг гэнэ.

Гэмт хэрэг сурталчилсан ямарваа зүйл гэмт хэргийг гаралтанд сөргөөр нөлөөлж, гэмт хэргийн үйлдлийг ихэсгэдэг байна. Ямартаа ч энэ мэт хийж буй уран бүтээлдээ ч, нэр томъёондоо ч гэмт хэрэг сурталчилсан утга агуулгыг оруулахгүй байхыг ЦЕГ-аас анхааруулж байна.