-Өчигдөр Н.Энхбаярын туслах Б.Тулгыг гэнэт баривчилсан чухам ямар шалтгаанаар баривчилсан юм бэ?

-Өчигдөр Б.Тулгын гэр бүлийн хүмүүс надад түүнийг баривчлагдсан тухай хэлсэн. Тэгээд би УМБГ-т очсон юм. Гэтэл харуул хамгаалалтын хүмүүс нь Отгонжаргал гэдэг хүн дээр байцаагдаж байгааг хэлээд мөн хоёр өмгөөлөгчийг нь байлцуулж байгаад баривчилж байцаалт авсан гэсэн. Энэ бол Эрүүгийн байцаан шийтгэх хуулийн 59.1-ийг зөрчсөн гэж би үзэж байгаа. Учир нь 59.1-д “Хэрэг бүртгэгч, мөрдөн байцаагч нь сэжигтнийг баривчлах тухай тогтоол үйлдэж, прокурорт танилцуулах бөгөөд прокурор нь шүүхэд танилцуулж шийдвэрлүүлнэ” хэмээн заасан байдаг. Тэгэхээр Б.Тулгыг баривчилсан явдал нь Эрүүгийн байцаан шийтгэх хуулийн 59.1-ээр заалтыг ноцтойгоор зөрчсөн үйлдэл болжээ. Гэвч уг хууль өчигдөр биш өнөөдөр биелэлээ олж байна. Сүхбаатар дүүргийн шүүх өнөөдөр хуралдаж, 14 хоногоор баривчлах тогтоол гаргасан. Монголд хэн нэгнийг баривчилсан хойноо шүүхийн шийдвэр нь гардаг ёс байхгүй.

-Та Б.Тулгатай уулзсан уу?

-Танай үйлчлүүлэгч хоёр өмгөөлөгчийнхөө хамт байцаагдаж байгаа гээд уулзуулаагүй. Уг нь бол баривчлагдан саатуулагдсан үеэс өмгөөлөгч үйлчлүүлэгчтэйгээ уулзах эрхтэй байдаг. Гэвч надад уулзуулах боломж олгоогүй.

-Хүч хэрэглэн баривчилсан гэдэг үнэн үү?

-Зарим нэг хэвлэл мэдээлэл дээр гарсан шиг манай үйлчлүүлэгчтэй хууль бус хандсан явдал гарсан эсэхийг би мэдэхгүй. Яагаад гэхээр би өөртэй нь уулзаагүй учраас хүч хэрэглэсэн, ийм тийм юм болсон гэж хэлж чадахгүй.

-Н.Энхбаяр дарга ямар байр суурьтай хандаж байна вэ. Хөдөө орон нутагт яваа гэсэн?

-Нийслэлийн прокурорын газрын Мөрдөн байцаах ажиллагаанд хяналт тавих албаны дарга Т.Жадамбаа Н.Энхбаярт ямар нэгэн эрүүгийн хэрэг үүсгээгүй гэж мэдээлсэн байгаа. Өөрөөр хэлбэл аливаа улс оронд хэн нэгэнд эрүүгийн хэрэг үүсгээгүй үед түүнд зориулж ажлын хэсэг байгуулагдан, шалгана гэж байхгүй. Тийм дүрэм ч байхгүй. Мөн эргэн тойрныхон хүмүүсийг нэг нэгээр нь хоморголон барьж, тэр тусмаа хууль бусаар баривчилж болохгүй. Үүнтэй хэн ч эвлэрэхгүй. Дараа нь мөн адил хэн нэгнийг ийм байдлаар баривчлахыг үгүйсгэхгүй. Дахиад хэлэхэд өчигдөр Эрүүгийн хуулийн 59.1 дүгээр заалт өчигдөр биелэгдсэн гэж бодтол өнөөдөр биелүүлж байна. 

Б.Чимэг