Наймдугаар сард шарилж, ургамал тоосоо гөвдөг тул энэ үед ургамал, шарилжны харшилтай иргэд аль болох хөдөө явахгүй байхыг эмч мэргэжилтнүүд зөвлөж байна. Эцэг, эхийн болоод аливаа гэр бүлээс хэн нэг хүн харшлын өвчтэй бол 25-50, хоёулаа бол 50-75 хувь нь хүүхдэд харшлах магадлал өндөртэй байдгийг сануулсан юм. Амьсгалын замын өвч­нөөр өвчлөмтгий хүүхдүүдэд ургамлын тоосны харшил хурдан халдварладаг тул болгоомжлохыг ч сэрэмж­лүүлж байна.

Энэ цаг мөчид хүмүүс тарьсан ногоо, зэрлэг жимс зэргээс харшил авах нь элбэг бөгөөд үүнийг мэргэжлийн үүднээс ургамлын тоосны харшил хэмээн онцолдог байна. Самар түүх, хадлан тариалан, амралт зугаалгаар хээр унтаад босоход нүд улайх, биеийн аль нэг хэсгийн арьс загатнах, хамраас шин­гэн ус гоожих, хамар битүүрч найтаах зэрэг шинж тэмдэг илэрвэл харшлын эмчид хан­дах хэрэгтэйг сануулсан. Харшлыг ханиад мэт ойлгож болохгүй нь. Учир нь манайхны хувьд дээр дурд­сан шинж тэмдгүүд илэрсэн тохиолдолд ханиад хэмээн дур мэдэн янз бүрийн эм, тариаг хэрэглэдгээс өвчнөө улам ч сэдрээдэг сөрөг зур­шил­тай аж. Тиймээс нэн түрүүнд харшлын эмчид хан­дахыг зөвлөж байна. Тэр бүү хэл, зарим тохиолдолд ханиаж, амьсгал бачуурч, цээж шуугих нь бий гэнэ. Мөн чихэн дотор болон хоолойн залгиурт хүртэл за­гат­наа үүсдэг гэсэн. Харшилтай бол халуун ногоо бүү хэрэглэ. Хамар битүүрэх байдал удаан үргэлжлэхэд хүчилтө­рөгчийн дутагдал илэрч, тол­гой өвдөх, ядрах, нойр муу­дах, уур уцаартай болох, хэл ам хатах, хөлрөх, зүрх дэл­сэх, хөдөлмөрийн чадвар буурах зэрэг тоосны хорд­логын шинж илэрдэг байна. Ургамлын тоосны харшилтай эсэх нь тогтоогдсон тохиолдолд ха­луун ногоо, хоол амтлагч, гүзээлзгэнэ, нимбэг, жүрж, чацаргана зэрэг харшил ихээр өгдөг жимс мөн самар, жимсний чанамал, дарс, өн­гө­тэй жүүс, ундаанаас тат­галзах хэрэгтэй. Мөн амьдрах орчиндоо аквариум­тай загас, таримал цэцэг, тэжээвэр амьт­дыг бүү байл­га. Тоос шороог нь цэвэрлэх нүсэр овор хэмжээ ихтэй тавилга, ил задгай ном, сонин хураах, хана, шаландаа хивс дэлгэж, ангийн арьс өлгөж хадах нь харшил үүсгэх бас нэгэн шалтгаан болдог байна. Түүнчлэн элдэв цацагч бо­дисууд, ургамлаас гаргаж авсан үнэртэй ус, саван зэр­гийг хэрэглэхээс зайлсхий. Ургамлын найрлагатай эм бэлдмэл хэрэглэхгүй байх нь чухал юм. Хэрвээ шарилж­наас харшилтай бол царванг хэрэглэж болохгүй юм байна шүү. Ургамал тоосоо үүрээр гөвдөг тул цонхоо хаагаарай.  Зуны улиралд өрөө, тасал­гааныхаа цонхыг шөнөдөө нээж үүрээр хаах хэрэгтэй юм. Учир нь ихэнх ургамал үүрээр тоосоо гөвдөг байна. Хүмүүс өдрийн ихэнх цагаа гэр орон, ажлын байрандаа өнгөрөөдөг. Тэгвэл ойр орчин­доо ургадаг шарилж, луулийг цэцэглэхээс нь өмнө тайрах эсвэл үндсээр нь устгаж хаях хэрэгтэй юм. Өрөө тасалгаан­даа байнга чийгтэй цэвэр­лэгээ хийх нь ургамлын тоос­ны харшлаас сэргийлдэг байна. Өвөл хүйтрэхээс сэр­гийлж дулаалга хийхийн өмнө ургамлын тоос, шороо тог­тож үлдсэн цонх, хаалга, хана, тавилгыг сайтар, угааж цэ­вэр­лээрэй. Хэрэв зуны ули­рал эхэлмэгц, анх удаа хар­шил авсан гэдэг шинж тэмдэг илэрвэл ургамал хагдарч гүйцэх үе буюу аравдугаар сард сорил тавиулж ямар ургамлаас харшил авснаа мэдэж эмчийн хяналтад орж зөвлөгөө авах шаардлагатай гэнэ. Харин хүүхдээ ямар зүйлээс шалтгаалан харшилж байгааг мэдсэн бол цаашдаа ажил мэргэжлээ сонгоход нь анхаарах хэрэгтэй юм.